Nagih Semaya Ngadege Ikawangi Nusantara
Antariksawan Jusuf (dipublikasikan pada Senin, 01 April 2024 08:38 WIB)
- Laporan
Ketua Umum Ikawangi Pusat Rusdi Maksum ngengetaken maning perlune organisasi Ikawangi Nusantara hang ring iwuh HBH taun sore wis diomongaken.
"Ikawangi Nusantara hang tau digagas sedurunge, nawi gesahe mandheg taping prosese tetep melaku... Muga-muga gancang ditemtoaken. Ketua lan wakile ana ring ngarep Isun," jare Pak Rusdi ring rapat Ikawangi Pusat ngenani Halal Bihalal ring umah dinas Menteri PANRB, Pak Anas, nubengi ((31/3).
Rapat sekaliyan buka bareng iku ditekani wong loro hang sedurunge tau disebut dadi calon ketua lan wakil ketua yaiku Pak Anas lan Pak Arief Yahya. Seliyane iku ana pisan Direktur Pemasaran Dalam Negeri Pak Marhaen, Sesepuh Ikawangi Pak Sutarjianto, ketua Ikawangi Pusat dhongkol Pak Bambang Sugiyono, Kabareskrim dhongkol Susno Duadji hang cumpu asale teka Genteng lan pirangane pejabat lan pengurus liyane.
Seperene ana pirangane Ikawangi dhaerah hang njaluk surat teka Ikawangi Pusat minangka rujukan payung organisasine, jare Pak Rusdi.
Pak Arief Yahya ngomong nawi tepak acara Diaspora ring pendhapa Shaba Swagata Blambangan engko tanggal 13 April bisa diomongaken masalah Ikawangi Nusantara iki.
"Isun bengen tau ngusulaken kadhung Ketua Ikawangi Nusantara iku ex officio ketua umum Ikawangi Pusat bain," jare Pak Arief, hang saiki magih cawe-cawe ngurusi Pariwisata husus.
Ikawangi minangka organisasine wong diaspora Banyuwangi wis nyebar nong endi-endi. Kecathet hang kawitan ngadeg yaiku ring Jakarta hang arane Pewangi Jaya (Perkumpulan Warga Banyuwangi Jakarta Raya) hang ngadeg taun 1972 lan arane ganti Ikawangi. Aju saya suwi saya akeh wong Banyuwangi hang megawe ring njaba lan padha ngadegaken Ikawangi sak Nusantara. Teka Sumatera sampek Papua. Malah ring mburi-buri iki ana kumpulan Ikawangi ring negara manca kayata Amerika, Hongkong, Jepang, Malaysia, Taiwan lan liya-liyane.
Seperene wong-wong Diaspora iku nggawe jalur komunikasi ring grup WA Ikawangi Dunia.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
