Nanas Aneh Teka Dukuh, Glagah
Antariksawan Jusuf (dipublikasikan pada Rabu, 13 November 2024 09:02 WIB)
- Laporan
Nanas Aneh Teka Dukuh, Glagah
Nanas aneh, sak umur-umur buru weruh merujuk ana ring Dukuh, Glagah. Uwohe gedhi nganeh-anehi merga ring saben matane, merujuk metu kembange sak dudingan-dudingan. Kabeh mata sak bunderan merujuk kabeh.
"Ana pertandha paran digi iki? ana musibah, ana... halah hing kathik gedigonan wis," jare Kang Usik, sesepuh Kampung Dukuh Glagah.
"Keanehan digu nawi nanas penyakiten ya hing weruh... hang weruh ya ahli biologi," jare kang Usik.
Serta potone dikirim nang wong hang duwe pekarangan, uwonge tepak ana ring Malang, malah takon tuku bibite nong endi.
Wit nanas iku setemene merujuk ring umahe "wong turis" hang ngerabi wong Kalipait aju manggon ring Dukuh. Jare Kang Usik, merujuk kaya "hiyasan pawon".
"Kepingine njuwut siji arep ditandur nawi merujuk," jare Kang Usik.
Marek diunggahaken pideone ring medhiya sosial, sakkal wong teka Jambi, Padang lan NTT takon merga kaju, nong dhaerahe durung tau ana kedadeyan kaya gedigu.
Serta keneng Kang Usik hang percaya karaktere wong Using cirine ladak, aclak, bingkak, tambah dirageni.
Mula dadi rada "gempar" nganggo istilahe Kang Usik, dihubungaken ambi Pilkada hang arep dianakaken ulan iki. "Belambangan mau ada apa ini. Pertanda apa ini?"
Salah sijine wong mau ana hang ngomong, barometernya Jawa Timur iku bumi Belambangan, Alaspurwo. Ambi Kang Usik diiyani bain. Malah aclake metu, "Barometernya Banyuwangi iku ring Dukuh," jare Kang Usik ambi ngakak.
"Tumontah Rika Dukuh dadi barometere Banyuwangi? Sak umur-umur kapan Dukuh dadi barometer?"
Sabene ring facebook ya ana wit kelapa hang modhele kaya pelanangane wong lanang, lan ambi Kang Usik diwarah gok uwite iku ana ring Dukuh. Uwong-uwong ya akeh hang kaju, kok akeh uwit hang aneh ring Dukuh. "Iya..Dukuh barometere Purwo," timpale Kang Usik.
Kang Usik minangka sesepuh Dukuh, ya duwe macem-macem wit hang aneh utawa wit-witan hang bisa digawe jamu. Ring umahe ana Gedhang Junjung Derajat iku werna uwohe abang, ontonge lan curunge iku ngadhep mendhuwur kabeh.
Sak curung gedhang iku lirangan tadhah udane nong ngisor lan ontonge nong ndhuwur.
Gedhang Junjung Derajat dipercaya hang nandur uripe bisa kecukupan sandhang pangane. Nawi nduwe pangkat supaya langgeng derajate.
Ana pisan ring Dukuh, gedhang sangkal, sak curung mung ana siji uwohe. Dienggo wong hang njaluk pulung utawa golet ndaru.
Seliyane gedhang, ana pisan gandarosa, pare gunung lan terong ngor.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
