Ngimpi Akademi Kesenian Banyuwangi

Antariksawan Jusuf (dipublikasikan pada Senin, 05 Agustus 2024 06:05 WIB)
- Laporan

Tepak magih uripe, seniman lan koreograper hang tau meguru ring Bagong Kussudiarjo Yogya, Sahuni, tau nduwe impen ngedegaken Akademi Kesenian ring Banyuwangi.
   Naming ring donya iki, paran bain hang digawe, ana bain wong hang dhemen ana hang sing. Paran jawabane, tepak ring jamane, ruwahe dianggep nguwahi gerakan juged Banyuwangen dadi njawani kaya dene hang diwulangaken Bagong.
   Jare Pak Sahuni setemene masa nguwah-uwahi gerakan mau, kabeh magih dijaga keaseliyane juged lan solah-bawane Banyuwangian. Mula diakoni, kadhung ana hang njuwut teka gerakan jugedan Jawa, iku merga jugedan Banyuwangi magih durung duwe alas aturan (dhasar sistem). Dadi hang sun lakoni mau, kanggo nggampangaken piwulangan nang lare-lare hang ajar njuged, uga kanggone wong njaba hang kepingin ajar juged Banyuwangi. Awak dhewek kudu jujur ngakoni, kadhung jugedan Jawa wis duwe “sistem” lan “dhasar-dhasar’ jugedan.
   Ditakoni penemune bab asil karya lare Banyuwangi seperono? Iyane njawab terus terang, seru senenge ndeleng mekar mekroke seni tari ring Banyuwangi. Iku ditandhai ambi akehe sanggar-sanggar seni tari hang mencungul ring Banyuwangi, sing terima ring kampung-kampung Using. Uga akeh Sanggar Tari Banyuwangi mecungul ring dhaerah-dhaerah kidulan.
   Naming kadhung ndeleng ‘mutu gerakan’, kudu diakoni magih akeh kurange. Nana pitungan hang mateng (konsep) kabeh obahe awak lan gerakan tariyane mau. Tuladhane, apuwa kok iki solahe hang dienggo, paran lemeke. Gedigu sak teruse. Malah isun mbiji, kadhung gerakan tari mau ulihe ngumpulaken teka gerakan-gerakan sak kelebatan, aju diramu lan direnteng dadi karya tari. Iki hang kudu dadi cathetan kanggo “koreografer” Banyuwangi, merga Banyuwangi tariyane wis duwe ciri has. Kari nambahi lan ndhuwuraken nang alas pikire, makene wong njaba uga bisa nerima dudu merga beda ambi liya. Naming ‘olah gerak’ lan ‘olah pikir’ mau, nyawiji nang ujude tariyan iku.
   Perkara impene? Pak Sahuni njawab sakat bengen, kepingin seru ana Akademi Kesenian Banyuwangi. Iki uga kanggo njejegaken keseniyan ring Banyuwangi, makene ana lemeke cara akademis. Kadhung sing gedigu, wong njaba ndelenge ambi micek siji. Akademi iki mau, uga kanggo panggone mujudaken ‘generasi penerus’ nang keseniyan ring Banyuwangi. Konsep wis ana, uga para pengajare wis ana. Isun uga wis nyawisi lemah kanggo mujudaken Akademi mau, adoh teka kutha Banyuwangi, yaiku manggon ring kecamatan Singojuruh. 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.