Pelatihan lan Lomba Nggawe Dongeng nganggo AI

Hani Z. Noor (dipublikasikan pada Senin, 30 September 2024 07:05 WIB)
- Laporan

Sengker Kuwung Belambangan (SKB) dina Sabtu 28/9 sore nggelar Pelatihan Nggawe Dongeng nganggo bantuwan AI. 
    Pelatihan iki magih sak gandheng ambi kegiyatan liya yaiku Lomba Ndongeng Basa Using Nganggo gambar AI.
    "Nawi ana wong hang kepingin milu taping hing weruh carane, SKB ngewani dalan," jare Ketua SKB Kang Aang hang uga dadi nara sumbere ring pelatihan liwat zoom iku.
   Dene Lomba Ndongenge dibukak sampek tanggal 25 Oktober lan dibiji sakuwise ditayangaken ring channel youtube TV Bain.
   Tepak Pelatihane, hang milu diajari nganggo telung software AI geratisan yaiku bing (kanggo nggawe gambar), canva (kanggo nambahi elemen ring gambar) lan capcut (kanggo ngedit gambar, nambahi suwara lan musik). Kelawan nganggo telung software iku bain wis cukup dienggo nggawe dongeng hang wis njumbul kaya ring TV Bain. Saiki wis ana 16 dongeng basa Using kanggo lalare. Mulai cerita kewan-kewan kayata Bajul ulang taun, Kidang hang hing weruh dalan mulih, Kuthuk tambeng sampek cerita lare hang ngaji ulih jajan.
   Lomba iku bisa dipiloni sapa bain, dhewek tah rame-rame sak kancaan.
Nganggo AI (hang geratisan utawa hang premium aliyas mbayar).
   Durasi dongeng 5-10 menit.
   Dongenge ditujokaken kanggo lare umur 7-12 taun.
   Hadhiyahe Piyala Asmorowati (aran ruwahe Ibuke Pak Sutarjianto hang nyokong kegiyatan iki) lan picis totale jutaan kanggo telung pemenang.
   Materi hang dibiji: 
1. Cerita/pelajaran teka dongeng.
2. Dubbing, basa Using.
3. Gambar slide. 
4. Unsur kebanyuwangian (nganggo basanan, wangsalan lll).
   Lomba iki tujuwane kanggo nguri-uri basa Using utamane ngenalaken nang lare-lare Banyuwangi lan ngewani media kanggo dongeng lalare manpaataken teknologi hang ana.
   Kadhung bengen, nggawe buku cerita sakat ide, nulis, ngewani ilustrasi, sampek cetak lan dipasaraken butuh wektu sampek telung ulan, nganggo teknologi AI saiki mung butuh telung jam wis bisa tayang, jare kang Aang.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.