Penulis Kecaruk Ilustrator Kanggo Naskah Basa Dhaerah

Antariksawan Jusuf (dipublikasikan pada Rabu, 24 Mei 2023 09:23 WIB)
- Laporan



Suwine telung dina tanggal 23-25 Mei, sangang naskah cerita Using dibeliyaki maning lan penulise dicarukaken ilustrator hang nggawe gambar kanggo bukune.
    Taun iki Balai Bahasa Jawa Timur (BBJT) ngelakoni rong kegiyatan ngenani basa dhaerah. Hang sepisan Revitalisasi Basa Madura lan Basa Using. Hang nomer loro nerbitaken cerita basa Jawa, Medura lan Using emeh tikel 10 timbang taun sore, jare Bu Ary Setyorini, S. Pd, Kasubag Umum BBJT tepak makili Kepala  BBJT Dr. Umi Kulsum, M. Hum hang tepak ana tugas ring njaba kutha.
   "Hang nggawe mongkog, ring antarane 110 karya, ana hang ditulis ambi lare SMP lan lare SMA," jare Bu Ary.
   BBJT uga wis nyiyapaken 36 ilustrator hang arep mbantu para penulis nggawe ilustrasi kanggo ceritane. Teka Banyuwangi ana loro ilustrator yaiku Apri Setiawan (teka Sobo) lan Lutfi Setiawan (teka Singotrunan). Aran mburine padha taping wong loro iku dudu pernah paran-paran.
   Ana sangang naskah cerita dwi basa Indonesia-Using hang arep diterbitaken BBJT. Naskah-naskah iku dipetani maning sedurunge diserahaken nang ilustrator.
   Jare Bu Ary, taun 2022 mung ana 16 naskah, taun iki ana 110 naskah, 79 naskah basa Jawa, 22 basa Medura lan 9 basa Using.
   Penulis Usinge yaiku Andi Sep Kurniawan, Nur Aini, Nur Holipah lan Urip Limartono.
   Sedurunge, Bu Umi ngomong gok iwuh iku uga nyokong anane buku wacanan hang apik kanggo literasi Indonesia.
   Rata-rata naskah buku basa Using iku ditujoaken kanggo lalare pembaca pemula umur 7-9 taun.
    Pungkasan, karyane arep diterbitaken lan bisa diundhuh ring:  https://balaibahasajatim.kemdikbud.go.id/. Dadi engko sapa bain bisa ulih dalan kanggo njuwut lan nduweni buku-buku hang diterbitaken.
   Naskah-naskah hang arep diterbitaken iku wis miloni proses seleksi hang diumumaken sakat ngawiti taun aju hang kepilih diumumaken ulan Maret kepungkur lan para penulise wis neken kontrak ambi BBJT. 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf