Rissa Churria, Buku lan Sereg Suksese Komunitas Sastra
Antariksawan Jusuf (dipublikasikan pada Kamis, 31 Oktober 2024 08:44 WIB)
- Laporan
Rissa Churria, Buku lan Sereg Suksese Komunitas Sastra
Kelendi carane bisa ngasilaken 10 buku puisi?
"Saben dina kudu nulis, paling using siji," jare Rissa Churria tepak nong acara peluncuran rong judhul buku puisine ring Cafe Arjuna, Kemiren dina Minggu 27 Oktober 2024.
Judhul buku hang dipeleciraken yaiku kecup selalu untuk Rasulullah (isine ana 52 puisi) lan sijine Larung Murung (53 puisi).
Sipate diwajibaken, suwi-suwi kerasa ana hang kurang kadhung hing nulis, jare penyair hang lair lan gedhi ring Tukangkayu lan saiki manggon noring Bekasi.
Sedurunge rong buku hang dipeleciraken sore wis ana Harum Haramain (2016), Perempuan Wetan (2017), Blaksuta Liku Luka Perang Saudara (2018), Matahari Senja di Bumi Osing (2019), Babad Tanah Blambangan (2020), Bisikan Tanah Penari (2021), Risalah Nagari Natasangin (2021), Pewayangan - Kembul Bujana Cinta Kamajaya Kamaratih (2022).
Ana pitakonan teka perupa lan penyair Slamet Sugiono, kelendi masalah pengendapan ide sedurunge dadi karya? Jare Rissa, karyane hang dadi buku lan terbit ring taun iki setemene wis dadi sakat rong taunan kepungkur.
Sedina-dinane Rissa iki guru. Naming megiyete ring donya puisi wis dadi sega jangan. Seliyane buku karyane dhewek, puisine wis diuwot nong lebih 100 buku antologi ring Indonesia lan negara manca. Durung maning ring koran-koran lan kerep tampil ring pestipal-pestipal sastera lan puisi.
Sakteruse kayane perlu ana komunitas hang bisa nyokong kegiyatane. Rissa milu Istana Puisi lan pengurus ring komunitas Jagat Sastra Milenia (JSM) hang dipimpin Riri Satria ahli komputer hang uga penyair. Rissa uga ngelola Rumah Baca Ceria.
Dene Riri, ngomong gok komunitas penyair ana hang maju ana kurang maju. Ana hang mung dadi panggonan padu sak antarane anggotane.
Riri Satria, doktor ilmu komputer, komisaris utama BUMN anake PT Pelindo wis nulis buku puisi Winter in Paris (2016), Siluet, Senja, dan Jingga (2019), Metaverse (2022), lan (bareng ambi Emi Suy) Algoritma Kesunyian.
Tepak ring Jambore Sastra Asia Tenggara sore, Riri dadi salah siji pembicara kelawan judhul makalah Tantangan Dunia Sastra di Era Kecerdasan Buatan.
Jare Riri, kadhung kepingin sukses, komunitas sastera, sarate ana telu:
1. Ring komunitas iku kudu ana penulis senior hang bisa dadi tuladha.
2. Kudu ana akademisi hang bisa ngewani kritik kanggo ngukur kuwalitase saben karya liwat kurasi.
3. Kudu ana manajer komunitas hang mumpuni lan duwe hubungan kang apik ambi sepongsor. Jabatan hang nomer telu iki aja sampek dielungaken nang seniman hang hing weruh manajemen.
Manajer komunitas iki kudu bisa nagih karya lan ngewani watesan waktu nang penulis. Dadi penyair bisa nggawe karya merga ana manajemen hang teratur.
Kelendi carane nggawe buku puisi bisa ulih bathi? Jare Riri, sara. Hang dilakoni, golet sepongsor lan bukune hing diedol taping dibagi.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
