Santunan Atusan Lare Atim ring Masjid Baiturrahman

Antariksawan Jusuf (dipublikasikan pada Senin, 08 April 2024 04:48 WIB)
- Laporan



Tradhisi santunan ning lare atim ajeg dianakaken Yayasan lan jamaah Masjid Agung Baiturrahman Banyuwangi, sak using-usinge saben ulan suci Ramadan. Puwasaan taun iki mathok rongatus santunan hang dielungaken saben malem ahad sak marine terawehan, ngarepaken sembayang witir.

“Alhamdulillah, taun iki ngelebihi target. Pathokane rongatus lare yatim piatu. Naming nyatane ngelebihi teka angka rongatus. Isun ngewakili pengurus yayasan nyampekaken kesuwun ning dulur-dulur hang magih gelem ngurusi lare-lare atim piyatu ring kampung-kampung, saingga yayasan gampang ulihe ngubungi. Isun uga nyampekaken kesuwun ning dulur-dulur donator hang selawase iki magih semangat sedhekah kanggo lare-lare atim piyatu liwat yayasan Masjid Agung Baiturrahman Banyuwangi. Muga kabeh bain ulih ridane Pengeran, Allah Taala,” abane Sekretaris Umum Yayasan Masjid Agung Baiturrahman Banyuwangi, Ir Iwan Azis Manggisan. Aktipis sastera iku nambahi, kadhung pancen paca ana pergantian kepengurusan yayasan, pengurus hang anyar aja sampek ngilangaken tradhisi santunan iku. “Iku amanat hang terus kudu dijaga. Eranisun iki uga nerusaken kepengurusan sedurunge,” imbuh Pemborong sukses iku.

Lare-lare atim piyatu iku nerima bingkisan arupa panganan mateng kanggo kebutuhane buka lan saur. “Sakliyane iku, yayasan ngelungaken picis. Gedhene, cukuplah kanggo sangu lebarane lare-lare. Merga, masarakat jamaah uga akeh hang nguweni lare-lare iku sekala. Dielungaken dhewek nalikane acara edum-eduman iku. Lumayanlah,” abane Bendahara Umum, Nurhasan, SE nalikane didhayohi belambangan.com ring Sekretariat Yayasan Masjid Agung Baiturrahman Banyuwangi unibengi.

Rongatus lebih lare atim piyatu iku saben malem ahad ditekakaken gentan-gentun teka kelurahan-kelurahan hang parek ambi Masjid Agung Baiturrahman Banyuwangi. Yaiku Kelurahan Singonegaran, Panderejo, Kepatihan, Singotrunan, Tukang Kayu, Kampung Melayu lan Temenggungan. “Sun karepaken, paran hang dilakokaken Yayasan Masjid Agung Baiturrahman iku bisa ditiru ambi mesjid-mesjid jamik ring kelurahan-kelurahan. Ya aja ring ulan puwasa thok. Ulan liyane pisan. Kadhung sepuluh Muharram iku uwis mula ana. Ulan-ulan liyane yara keneng dienggo acara yatiman. Kayadene ulan Mulud. Kanjeng Nabi iku yara apake lare atim piyatu sedawane jaman,” abane Hj. Nurbaiti hang nggawa lare atim piyatu teka Kel. Singotrunan. Iyane uga ngarep-ngarep, lare-lare atim piyatu iku sing mung disantuni materi. Naming uga anaa hang aweh ilmu agama, makene lare-lare iku uga siap ngadhepi urip ring dina mburine hang saya tambah gedhi tantangane.

(Kang Ujik)   

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf