Seni Topeng Medura Magih Diuri-uri Generasi Milenial Songgon

Antariksawan Jusuf (dipublikasikan pada Jumat, 01 September 2023 08:30 WIB)
- Laporan



Bisa bain Muraksan ambi Mateno gemuyu ring donya liya tepak ndileng pentas seni topeng ring ngarep SDN 2 Songgon, 28 Agustus suwengi jampleng. Hing merga muyabe punakawan, naming ndileng anak putune guyub rukun nguri-uri seni topeng kriya aseli teka Sumenep hang digawe mbah buyute. Kadine hing ana topeng anyar hang digawe ring Banyuwangi. Mung kadhang dicet maning kanggo kundangan makene katon anyar.

Diedegaken tanggal 8 Februari 1962 ring ruwahe pak Muraksan hang kelairan Sumenep. Iyane ngawiti nganggo aran "Rukun Famili" aju ring era reformasi ganti aran dadi "Laras Mustoko Jalmo" kanggo miloni jaman. Disangga pisan ambi anake hang aran Mateno. Saiki dipimpin putune yaiku Ayu Santoso hang wis mangkat nyiyapaken generasi kepapat: para buyut. "Sak liyane dikawiti tari has dhaerah uga kene ya nampilaken tari dhaerah Banyuwangi kaya jejer Jaran Dhawuk utawa Kembang Pesisiran utawa Jaran Goyang. Naming magih diiringi kaset. Mengarepe arep disiyapaken tabuhan urip. Kene dhewek wis nduwe seni jaranan hang tuwuk kundangan." ucape M.Wahyudi, pemandu acara hang bisa basa Jawa alus ambi Medura uga Indonesia, kaya hang disampekaken kapanane.
   Saiki ditambahi pengurus M.Sholeh Baudi (43), panjak ana 11 uwong hang sebagiyan ngerangkep dadi pemain ambi hang mimpin ndonga niyat hajat tuan rumah manut macaan ambi Kita Pendhawa teka Kae Sawidin. Ana hang bagiyan genjot, bagiyan damar, ngerek kelir, tukang paes, ambi tukang nyiyapaken penganggo. Dhalange Rustam ambi tepak ruwatan Riswanto. Kabehe ana 40 uwong,  tambah 1 suteradhara Budiono. Nubengi njuwut lakon "Prahara Wibisana Mbalelo". 
"Kene siyap cerita Petruk Dadi Ratu utawa Gatot Kaca Kembar, kene butuh kira-kira sak ulan latihan. Ambi ngucap sukur pemaine ana hang sekolah ring SMPN 1 Ambi 2 Songgon Ambi Mts swasta makene bisa tetep yakin seni topeng bisa jaya ring era milenial Iki." ucape Sholeh nyang belambangan.com. Sholeh uga cerita kadhung paguyuban seni topeng hang diurusi wis duwe nomer induk kesenian hang idine digawe ring mall pelayanan publik ambi tau sepisan ulih pitulungan dana hibah kanggo mbecikaken sarana prasarana.

"Karepe kene kelendi ndane bisa diundang Bupati kanggo tampil ring Disbudpar utawa acara festival Banyuwangi," impene dibeneraken Wahyudi ambi Wiji Misto hang dadi ketua kelompok peternak Kambing ambi susu Etawa organik uga kopi khas Puputan Tegalrejo Bayu. 

Pertunjukan seni topeng kaya dene janger, Rengganis, utawa Damarwulan sak macem ambi ludruk lan ketoprak. Naming meraji nyang wayang uwong hang pemaine nganggo topeng uga hing ngomong, naming ana dhalange. Cerita umume teka sumber hang padha yaiku cerita Barata Yuda utawa latar mburi sejarah.

Ring kundangan nubengi yaiku nadar tuan rumah dhung duwe anak lanang bakale ngundang seni topeng mesisan ruwatan tepak kawinane anak lanang kepindhone. Anak penggarepe wadon hang wis nguweni putu. "Alhamdulillah, dawa umure ambi ana rejeki hang wis bisa ngelakoni nadar. Girang seru rasane," ucape Mbah Suwardi dikancani rabine ambi nyalami tamu hang nguweni donga restu makene keluwarga anak lanange samawa uga ngelairaken generasi hang soleh soleha.
Ngawiti tontonan wong tuwek ngelakoni ritual bukak kupatan isi beras kuning uga ngarepaken subuh, penganten ngelakoni adus kembang.

Ring tengah atusan wong hang ndileng, lalare cilik sampek wong tuwek, ana turis hang ngerabi lare medura uga nyekolahaken anake ring SDN Rogojampi hang aktip ndokumentasikaken teka HPne. Ana anggota Polsek Songgon hang milu njaga suwasana Kamtibmas. Ana seniman hang tukang nggawe lagu Djhon Sawo, ambi penyair uga pemain teater teka sanggar merah putih '45 Bung Aguk Darsono. Sutradara ambi dhalang uga pelatih tari sak panjak, kudu diajak pelatihan bareng para pemain tradhisonal Jawa uga hang dianakaken Disbudpar ambi Dewan Kesenian Belambangan. Iki perlu revitalisasi ambi apresiasi hang gelem nguri-uri budaya bangsa hang duwe karakter. Makene seni topeng terus urip ambi seni pertunjukan hang manut perkembangan jaman.

(AWN/YC/OPI)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Aguk/Yeti/Opi

Editor: Hani Z. Noor