Silaturahim Bisa Nguwahi Takdire Awak Dhewek

Antariksawan Jusuf (dipublikasikan pada Selasa, 26 Maret 2024 07:52 WIB)
- Laporan



Silaturahim aja dianggep entheng, merga silaturahim bisa nguwahi takdhire awak dhewek, jare Ustad Sirojul Munir tepak acara Buka Bareng ring Sekretariat Ikawangi Tangerang Selatan, ring umahe ketuane yaiku Mbok Titin Iriani dina Minggu 24 Maret kepungkur.
   Ustad hang tau sekolah lan ngaji ring Maroko iki nerusaken, nyebut hadis: Sang sapa kepingin diakehi rejekine lan didawakaken umure, akehana silaturahim. Silaturahim dudu mung sukur sanja nang umahe wong taping mbecikaken hubungan hang pedhot.
   Mangkane paran hang kene lakoni saiki iki, yaiku Buka Bareng, aja dianggep entheng merga iki bisa dadi wasilah donga-donga makene dikabulaken Pengeran. Mula dadine merga ihlase awak dhewek nyang niyat silaturahim iki. Bisa bain ganjarane, dongane dhewek iki dikabul persis padha ambi hang dijaluk. Utawa dongane dikabulaken kelawan cara diadohaken ring bebaya hang sak mesthine keneng nong awak dhewek. Allah nguwahi cathetan iku merga awak dhewek njejegaken silaturahim.
   Contone tau diriwayataken bab Nabi Sulaiman, hang bisa ngajak gesah molekat maut. Kadhung molekat maut katon ring Nabi Sulaiman iku wis dadi tandha gok ana wong parek Nabi Sulaiman hang umure kari nganteni itungan dina. Temenan, Nabi Sulaiman diwarahi gok Si Fulan kurang telung dina engkas umure. Nabi Sulaiman kelayung merga salah siji kanca rakete arep ninggal donya. Cumpu sampek sangang ulan wonge magih wutuh, magih meceger. Aju Nabi Sulaiman mikir endane molekat bengen iku nggacah nang isun? Endane hang bengen iku setemene iblis hang mencala dadi molekat?  Tepak kecaruk maning, Nabi Sulaiman takon kok Si Fulan magih urip, jare sangang ulan kepungkur arep dijabut nyawane? Jare molekat, iya sedina marek kecaruk iku Si Fulan nyambung silaturahim hang sedurunge wis pedhot. Aju Alloh nambahi umure 20 taun.
"Alloh iku nduweni kuwasa kanggo mbusek takdir-takdir hang wis ketulis lan Alloh netepaken takdir hang anyar sak karepe Iyane" (Ar Rad 39).
   Jare Ustad Munir yaiku arane Kodar (takdir hang kabeh wis ketulis sedurunge) aju kadhung wis kelaksan arane Kada. Takdir magih bisa diuwah liwat donga lan amalan-amalan hang mbarengi donga.
   Ikawangi Tangerang Selatan iki ngadeg tanggal 12 Juli 2020 lan anggotane saiki wis ana 50an keluwarga hang manggon ring Bintaro, BSD, Ciputat, Cisauk, Pamulang sampek Pondokcabe, malah ana hang melebu pinggirane Bogor.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor