Tabuh Gong Tandha Diangkati PORFESI IV
Nani Asiany Mustikowati (dipublikasikan pada Jumat, 10 November 2023 07:07 WIB)
- Laporan
Ampak-ampakan atlit lan seniman murid-murid TK sampek SMA/SMK ring dina Kemis isuk tanggal 9 Nopember 2023 iku padha ngeleboni panggonan ngumpul nong lapangan KH. Ahmad Dahlan Perguruan Muhammadiyah Rogojampi sakperlu nekani pembukakane PORFESI IV. PORFESI kang singkatane teka Pekan Olahraga dan Festival Seni Islami kang wis kaping IV iku dianakaken saben rong taun sepisan lan dipiloni murid-murid sakat TK sampek SMA/SMK lingkungan perguruan Muhammadiyah sak kabupaten Banyuwangi, uga kanggo nyambut Milad Muhammadiyah kaping 111 taun iki.
Masiya acarane dibukak isuk-isuk taping hawa panas kang kemelethak nggarahi lare-lare sing bisa kateg ulihe ngadeg. Mula, tepak buru tampil lare-lare SD Muhammadiyah VI Genteng mainaken drumband magih semangat ndileng, paran maning sekolah iki wis bolak balik dadi juwara lomba drumband tingkat Jawa Timur, taping serta wayahe ketua panitiya, Drs. H. Suyanto, M.M nguweni sambutan, kang baris lan ngadeg nong lapangan iku mangkat rontok. Ana kang mundur sakperlu ngiyup nong mburi, ana kang mendheg, lan ana kang ngelesod. Untung bain, serta wayahe ketua Pimpinan Daerah Muhammadiyah kabupaten Banyuwangi Dr.H.Mukhlis L, M.Si diweni kesempatan nguweni sambutan, iyane sing gelem munggah ring genjot kang wis disiyapaken taping ngajak kabeh kang hadir supaya mareki genjot lan terob. Sing mung peserta PORFESI kang mara, sak guru-gurune kang ndhampingi dikongkon marek pisan. Ahire acara kang sakdurunge kingslep dadi semangat. Paran maning ketua PD M iku ngunekaken yel-yel, kang aju ditirokaken peserta, kahanane dadi meriyah. Ketua PD Muhammadiyah iku uga sing kathik pidhato, langsung mbukak acara PORFESI aju munggah nong genjot lan nabuh gong, disusul nabuh gong pisan ketua panitiyane, ketua PD Aisyiyah, aju Kepala Desa Rogojampi.
Kaya kang wis dilaporaken ambi ketua panitiya, peserta PORFESI taun iki akehe 2.290 siswa. Kang milu lomba olahraga akehe 1.304 lare sedheng kang milu lomba kesenian Islami akehe 986 lare. Ketua panitiya nyampekaken terimane merga sekolah-sekolah kang nyambut PORFESI taun iki pol semangate. Pesene supaya peserta bener-bener maksimal ulihe lomba embuh iku lomba olahragane utawa keseniane. Pesen liyane supaya lomba iki bener-bener njaga sportivitas uga asile keneng dipercaya. Cabang olahraga kang dilombakaken ana 14, antarane ana melayu, tapak suci, basket, panahan, sekak, pingpong, badminton, sampek putsal lan ngelange utawa renang kang rencanane dianakaken ring Muncar. Kadhung kesenian Islamine, kang dilombakaken antarane ngelukis, drama/teater, maca guritan, nyanyi koor, tartil, tahfidz, lan kaligrapi. Ketua panitiya kepingin, sakliyane lare-lare kang milu lomba iku duwe prestasi taping bisaa duwe kemampuan tandhing ambi murid-murid kang ana nong njabane sekolah Muhammadiyah. Dadi masiya engko wis menang lomba tetep ditingkataken prestasine. Kesehatane uga kudu tetep dijaga. Ahire sakdurunge nutup sambutane ketua panitiya ngarep-arep muga-muga lakune PORFESI iki lancar.
Kang dadi bintang ring acara pembukaan PORFESI dina iku tampile murid-murid SMK Muhammadiyah Rogojampi. Lare-lare iku terampil mainaken angklung Sunda kang modhele kaya patrol digantung iku. Gendhing-gendhing kang digawa terus-terusan utawa medley gendhing nusantara. Ana gendhing Yamko Rambe Yamko, Ampar-ampar Pisang, Suwe Ora Jamu, Layang-layang, sampek gendhing Umbul- Umbul Blambangan.
Panitiya kang nangani PORFESI iki teka majelis Dikdasmen PD Muhammadiyah. Kadine kang hadir makili teka PC Muhammadiyah akeh-akehe teka majelis Dikdasmen sak Banyuwangi pisan. Diundang lan hadhir nong acara iku PD Aisyiyah Banyuwangi, Kepala Desa Rogojampi, lan Kepala Sekolah TK sampek SMA/SMK Muhammadiyah sak Banyuwangi.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
