Telulas Buku Cerita Anyar Kanggo Lalare Using-Indonesia

Antariksawan Jusuf (dipublikasikan pada Sabtu, 22 November 2025 07:18 WIB)
- Laporan

Telulas Buku Cerita Anyar Dwi Basa Using-Indonesia

Ana 13 buku anyar cerita kanggo lalare dwi basa Using-Indonesia dina Senen kesuk arep dipeleciraken Balai Bahasa Jawa Timur (BBJT) ring Hotel Mercure Grand Mirama Surabaya.
   Jare Ketua Panitiane Bapak Awaludin Rusiandi hang uga Ketua Tim Kerja Pengembangan Bahasa dan Sastra BBJT,
taun 2025 iki buku hang dipeleciraken akehe 123 buku cerita anak dwi bahasa. Ana 89 cerita anak nganggo basa Jawa-Indonesia, 21 cerita basa Medura-Indonesia lan 13 cerita anak nganggo basa Using-Indonesia.
   Seliyane meleciraken buku, kesuk Senen iku ya ana diseminasi produk terjemahan hang digesahaken rong panel.
   Hang kawitan kelawan narasumber teka Perpusnas nggawa judhul gesahan "Cerita Anak dengan Dampak Nasional melalui Proses ISBN" lan teka Pusbuk nggawa judhul gesahan "Cerita Anak dengan Standar Penjenjangan dan Penilaian Nasional."
   Dene Panel kepindho narasumbere Dian Kristiani kelawan judhul gesahan "Mewujudkan Cerita Anak yang Bermakna sesuai dengan Aturan Penjenjangan yang Berlaku" lan Ilustrator "Mengilustrasikan dengan Hati: Jembatan antara Kata dan Imajinasi."
   Ring pembukaane emben arep diisi ring Kepala Dinas Perpustakaan dan Kearsipan Jatim, lan ana sambutan lan mbukak acarane ring Kepala Dinas Pendidikan Prop. Jatim.
   Dene hang diundang ana wakil 3 UPT kemendikdasmen, BPK Wilayah XI, Dinas Pendidikan kabupaten dan kota, Dinas Perpusip kabupaten dan kota, perusahaan penerbitan, penulis, penerjemah, ilustrator, guru, siswa, wartawan, lan liyane.
   BBJT wis sakat 2022 nggelar iwuh nulis cerita dwi bahasa kanggo lalare.
   Taun 2022 mung ana 16 buku, taun 2023 munggah dadi 110 buku,  taun 2024 nambah maning dadi 113 buku lan taun iki dadi 123 buku.
   Cerita basa Usinge yaiku: Misteri Naga Listrik (Elisa Dwi Susanti), Siji, Loro, Telu, Tarik (Andi Sep Kurniawan), Sukamade Akeh Penyune (Lailatul Badriyah), Oh Gedigu Ceritane (Rayhan Rizki Fadhillah), Kembang Mawar Duwene Sekar (Nur Aini), Paran Hang Kelap-Kelip (Novi Susanti), Keluwung Ring Kampung Using (M. Sadam Muarif), Dandang Dumpil (M  Sadam Muarif), Keneng Tundhik (Andi Sep Kurniawan), Kelemben Mina (Ratih Puspa Sari), Nyanthing Gajah Uling (Nur Aini), Jogi hang Gathek (Wahyu Rizki Kurnaini), Umah Kemiren (Putri Nurul Azizah).
   Engkone, karya-karya bukune arep diunggahaken lan bisa diunduh ring:  https://balaibahasajatim.kemdikbud.go.id/
   Dadi engko sapa bain bisa ulih dalan kanggo njuwut lan nduweni buku-buku hang diterbitaken.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.