Wis 375 Buku Cerita Lalare Dwi Basa Diterbitaken BBJT
Antariksawan Jusuf (dipublikasikan pada Senin, 24 November 2025 15:46 WIB)
- Laporan
Wis 375 Buku Cerita Lalare Dwi Basa Sakat 2021
Sakat taun 2021, wis ana 375 buku dwi bahasa hang wis diterbitaken Balai Bahasa Jawa Timur (BBJT) nganggo basa dhaerah yaiku Jawa, Medura lan Using.
Kepala BBJT, Dr. Puji Retno Hadiningtyas S.S.,M. Hum, ngomong ring acara Diseminasi Dan Peluncuran Produk Terjemahan Tahun 2025 ring Hotel Mercure gok BBJT nyokong gerakan Literasi nasional hang digelar teka Aceh sampek Papua. Sak Indonesia ana 5000 judhul buku asing hang dialihbasa nyang basa Indonesia.
Kanggo taun iki bain , BBJT ring program ngalih basa iku ngetokaken 123 buku hang dipeleciraken ring Hotel Mercure Mirama Surabaya.
Buku-buku iki minangka pucite dalan kreatip hang dawa lan ebek dedikasi. Teka ide, proses iki merujuk dadi nulis, ngalih basa, nggambar, nyunting sampek wayah meleciraken.
Lebih 200 wong hang milu cawe-cawe kanggo proses literasi gedhe hang wujude dadi 123 judhul buku hang programe wis dikawiti sakat Pebruari 2025. Yaiku
103 penulis, 50 penerjemah, 41 ilustrator,
12 penelaah, lan 15 penyunting, jare ketua Panitiyane Awaludin Rusiandi.
Jare Kang Sandi, celukane, buku hang dipeleciraken dina iku dudu mung kumpulan kertas lan tulisan. Naming iki minangka cendhela donya, kanca imajinasi lan cara kanggo nggawe girang lalare sinau basa Indonesia lan basa dhaerah uga STEAM (Science, Technology, Engineering, Arts, Mathematics).
"Buku-buku iki diarepaken bisa merujukaken kerenteg maca ring lalare kawit cilik, nyugihaken ucap-ucap lan mbukak wawasan budaya lare-lare Indonesia makene sagah saing ring donya naming hing ninggalaken jati diri lokal.
Ring pungkasan acarane, saben penulis, ilustrator, penyunting lan penelaah nerima penghargaan teka BBJT.
Ana 13 cerita basa Using ring antarane 123 buku anyar iku yaiku: Misteri Naga Listrik (Elisa Dwi Susanti), Siji, Loro, Telu, Tarik (Andi Sep Kurniawan), Sukamade Akeh Penyune (Lailatul Badriyah), Oh Gedigu Ceritane (Rayhan Rizki Fadhillah), Kembang Mawar Duwene Sekar (Nur Aini), Paran Hang Kelap-Kelip (Novi Susanti), Keluwung Ring Kampung Using (M. Sadam Muarif), Dandang Dumpil (M Sadam Muarif), Keneng Tundhik (Andi Sep Kurniawan), Kelemben Mina (Ratih Puspa Sari), Nyanthing Gajah Uling (Nur Aini), Jogi hang Gathek (Wahyu Rizki Kurnaini), Umah Kemiren (Putri Nurul Azizah).
Engkone, karya-karya bukune arep diunggahaken lan bisa diunduh ring: https://balaibahasajatim.kemdikbud.go.id/
Dadi engko sapa bain bisa ulih dalan kanggo njuwut lan nduweni buku-buku hang diterbitaken.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
