Alumnus SMAN Banyuwangi, Ikranegara, Sampek Umur
Antariksawan Jusuf (dipublikasikan pada Kamis, 09 Maret 2023 05:12 WIB)
- Obituari
Dina Senin tanggal 6 Maret sore, salah siji wong lulusan SMAN Banyuwangi hang dadi aktor film nasional, Ikranegara, ninggal donya umur 79 nong umahe ring Bali.
Isun rungu bengen teka sastrawan Bali ruwahe Pak Sunaryono Basuki, gok Ikranegara iku aran samaran ring donya pilem lan drama. Celukane Akri tepak diwalik dadi Ikra. Merga asale teka Negara, Jembrana, Bali iyane nambahi arane dadi Ikranegara. Aran setemene HM Bakri bin HM Saleh Usman.
Tepak sekolah ring SMAN Banyuwangi lan lulus taun 1964, iyane ngekos ring umahe ruwahe Wak Hasnan Singodimayan. Ring keluwargane Wak Hasnan, iyane diceluk "Lik Akri."
Kabar kesripahan iki disampekaken ring salah siji anake yaiku Innosanto Nagara. Jare ninggal donya merga keneng penyakit Alzeimer lan impeksi paru-paru.
Ikranegara setemene nduwe getih campuran, ana Bali, Jawa, Madura lan Bugis. Kawentar merga peran komedi lan dramane. Iyane nggenteng main drama ring Teater Muslim Yogya, Teater Kecil, Teater Saja Jakarta. Aju main pilem. Aktinge hang paling kesuwur yaiku tepak iyane main ambi aktris Ully Artha ring pilem drama komedi romantis Kejarlah Daku Kau Kutangkap (1986) lan Keluarga Markum (1986)—hang setemene terusane pilem Kejarlah Daku Kau Kutangkap.
Merga aktinge iyane dinominasiaken ring Piala Citra Festival Film Indonesia sampek pindho. Hang sepisan minangka peran "paman" (Aktor Pendukung Terbaik) ring Kejarlah Daku Kau Kutangkap (1986) uga nominasi Aktor Terbaik minangka perane dadi tokoh pendiri Nahdlatul Ulama, Hasyim Asy'ari ring pilem biografi Sang Kiai (2013).
Pilem-pilem hang iyane piloni yaiku antarane
1. Kejarlah Daku Kau Kutangkap
2. Keluarga Markum
3. Laskar Pelangi
4. Sang Pencerah
5. Sang Kiyai
Seliyane dadi aktor, iyane uga dadi pelukis lan sastrawan.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.