Anake Wong Banyuwangi Madeg Dadi Laksamana Muda ring Angkatan Laut

Hani Z. Noor (dipublikasikan pada Jumat, 22 Maret 2024 10:40 WIB)
- Tokoh



Tanggal 21 Februari 2024 kepungkur ring jajaran TNI Angkatan Laut ana pelantikan pejabat Asrena Kasal. Mula wis biyasah ring instansi paran bain ana pejabat hang digenti utawa munggah pangkat, duwe jabatan anyar lan sepiturute. 
   Pejabat hang mandhegani jabatan Asrena Kasal iku arane Laksda TNI Achmad Wibisono, S.E., CHRMP.  Pangkat Laksamana Muda (Laksda) ring Armada Angkatan Laut iki padha ambi Mayor Jenderal ring Angkatan Darat lan Marinir utawa Marsekal Muda kadhung ring Angkatan Laut. 
   Hang nggarai mongkog yaiku Laksda Achmad Wibisono iki minangka anake wong Banyuwangi. Ruwahe Bapake, aran Mayjen TNI Mar (purn.) Aminullah Ibrahim mula aseli Banyuwangi. Pak Amin hang jabatan pungkasan ring militer yaiku Komandan Korps Marinir taun 1987-1990 lan sakuwise purnawirawan iyane dadi anggota Komisi 1 DPR RI sampek taun 1999. Ketulis ring data pribadine, Pak Amin lair ring Bangorejo, Banyuwangi, tanggal 30 Nopember 1937. Iyane sampek umur taun 2021 lan dikubur ring Taman Makam Pahlawan Nasional Utama Kalibata, Jakarta kelawan upacara militer. Ruwahe Pak Aminullah iki dadi salah siji sesepuh ring Jakarta hang nggawe mongkog keluwarga Ikawangi, lan pak Aminullah iki uga pamane ketua Umum Ikawangi Pusat saiki yaiku Mayjen TNI Mar (purn.) Rusdi Maksum. Dadi Pak Achmad Wibisono iki misanan cer ambi Pak Rusdi Maksum.
    Masiya beda ambi bapake hang marinir, anak nomer lorone Pak Amin miloni dalan dadi tentara ring Angkatan Laut Armada. Karire ring Angkatan Laut apik pisan lan nggadug ring posisi saiki kelawan pangkat Laksda utawane jenderal bintang loro aliyas Mayjen, padha ambi bapake.
   Laksda Achmad Wibisono hang lair tanggal 22 Juni 1970 iki lulus teka Akademi Angkatan Laut taun 1992, nduweni riwayat jabatan mulai Danlanal Banjarmasin, aju ring KRI Yos Sudarso-353 (2012-2013), Dansatkor Koarmabar, Asrena Pangkoarmabar (2018), Paban II Jemen Srenal (2021), Danlantamal I/Medan (2021-2022), Waasrena Kasal (2022), Kaskoarmada I (2022-2023), Kaskogabwilhan III (2023), Kaskogabwilhan II (2023), Pangkoarmada (2023-2024) lan Asrena Kasal (2024-seprene).
   Kala cilik lebih akeh urip ring Surabaya miloni tugas bapake, lan merga emake wong Surabaya, basa hang dienggo sedina-dina mula lebih akeh nganggo basa surabaya-an. Taping merga keluwarga bapake magih akeh hang manggon ring Banyuwangi, saben-saben sakat cilik iyane ya menyang sambang keluwarga ring Banyuwangi, ngenali olah-olahan Banyuwangi.
Muga jabatan hang disangga ring pundhake bisa dilakoni kelawan apik lan amanah.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf