Asal-usule Istilah Hadrah Kuntulan

Antariksawan Jusuf (dipublikasikan pada Sabtu, 27 Juli 2024 04:13 WIB)
- Esai

Sapa hang weruh asal-usule aran kesenian Kuntulan? Kadhung hing merga ana cathetane ruwahe Hasnan Singodimayan nawi wis ilang cerita sakbenere.      
    Taun 2018, umur wis 87, Wak Hasnan magih produktip nulis lan taun iku iyane ngetokaken novel basa Indonesia Hadirnya Setiap Malam & Semalam Suntuk.
   Novel iku nduduhaken kaweruhe  ring budaya Belambangan. Judhule iku mau setemene alihbasa teka Basa Arab Hadara kuntu lailan fi kullu layalin. Ring kupinge wong Banyuwangi dadi Hadrah Kuntulan. Malah ring basa sabendinane digawe cekak maning dadi mung Kuntulan. Jare Wak Hasnan, Kuntulan minangka seni Timur Tengah hang ngerandhu bengi.
   Wak Hasnan santri lulusan Pondok Gontor, dadi basa Arabe rada lanyah, kelebu nerangaken ucap-ucap Using hang asale teka basa Arab kaya hadrah mauka. Uga umpamane asale ucap 'kakehan sereyat' setemene teka 'kakehan syariat'. Sithik-sithik ngomong syariat, "Halah wis aja pati kakehan sereyat" kira-kira gedigu muasale.
   Hing mung basa Arab hang dadi keahliane, tepak magih uripe, iyane dadi panggonan pitakonan bab budaya Banyuwangi. Diistilahaken ambi koran Kompas "sumur tanpa dasar" merga pasehe kadhung ngomongaken budaya Belambangan.
   Minangka pegawai dinas perikanan, iyane ya nyumbang istilah nang bahasa Indonesia yaiku "benur" (benih urang) kanggo anake urang.
   Kanggone seniman Banyuwangi Hadrah Shalawat diadhopsi kalangan pesantren dadi wujud tarian.
   Novel iku ceritane hing mung kekarepan nguri-uri budhaya hang diduduhaken ring ceritane hang nyenggol paran bain hang bisa kedadeyan ring Banyuwangi, kayata Mekkah, poligami, konflik ring desa. Kabeh nyumber teka falsafah Using Dulur Papat, Siji Pancer.
   Setemene ceritane magih sakkelupekane cerita pegawai ring Banyuwangi, kaya ceritane ring novel dwi-basa Niti Negari Bala Abangan (penerbit SKB, 2015). Hing kelalen cerita santet umah-umah hang ana hubungane ambi kewan umahan hang sikile papat yaiku: asu (ason), babi (kesrek), jaran (goyang), kebo (bodho), kucing (gorang), sapi (rambon), wedhus (kelumus).
   Lan kaya biyasahe, aran-aran lakone ya nganeh-anehi. Zam zam hang duwe rabi loro hang karo-karone minangka rabi hang kepisan: Ngumbar Sapi Alas lan Sriti Tengahe Sawah. Karo-karone duwe anak kembar sepasang, hang lanang diarani Tanpa Una, Tanpa Uni lan hang wadon Sayu Puput lan Sayu Pipit. Seru Belambangane.
   Sak mareke novel Hadirnya Setiap Malam dan Semalam Suntuk, Wak Hasnan nulis novel Warung Bathokan (2021) Sedurunge maning ana Badai Selat Bali (1994), Kerudhung Santhet Gandrung (2003), Suluk Mu'tazilah (2011), novel Using-Indonesia Niti Negari Bala Abangan (2015).
    Muga-muga dipadhangi kubure.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.