Banyuwangi Bengen, Ura-Ura Njerone Kutha (Bagiyan 2, pungkas)

Antariksawan Jusuf (dipublikasikan pada Sabtu, 04 Mei 2024 06:34 WIB)
- Opini



Ura-Ura Jerone Kutha (Bagiyan 2, pungkas)

Dalan nyang pasar, akeh tukuk gedhi-gedhi duwene wong Cina lan wong Arab. Pas ning perapatan dalan gedhi, ana tukuk apotek duwene Landa lan toko Nanyo duwene wong Jepang.
   Dalan hang paling rame ring perapatan biskop. Isuk sampek bedhug dijaga opas (pulisi) hang ngadeg ning tengah. Tangane dibungkus tandha kaya jaran poleng. Kepala pulisi diceluk Sekaut, nunggang sepidhah montor dhut-dhut. Mangkane diarani sepidhah udhut. Kendharaan hang paling akeh mung dhongkar lan sepidhah pancat.
   Jurusan ngetan sampek Tegal Loji ning Inggrisan lan Kamar Bola ning Biskalan. Jurusan ngalor sampek Kampung Arab, sing wani ngalor maning merga ana Keramat, makam Datuk Ibrahim lan timbangan montor.
    Jurusan ngulon, cukup sampek nang rumah sakit, merga kulone ana buwi peranteyan, panggonane maling lan begal dikunjara.
   Hang aran wit asem rapet sampek desa Penataban. Akeh manuk belekok, taine putih sak dawane lurung. Hang rada rame jurusan ngidul nyang Perliman. Ana tukuk buku Fortuna lan percetakan Aliance, nyewakaken buku, buku silihan. Aja sampek ngidul nyang Sumber Kelampok hang diarani Sumber Seng. Merga sak kidule pabrik beras, ana kuburan Sitra Penganten lan kuburan Landa ning pinggire dalan.
   Perliman iku dalan hang mbingungaken. Akeh wong hang kepaling nang kono. Ngulonaken nang Mojoroto hang diarani Bulivar, umahe Landa lan ambtenar. Umahe gedhi-gedhi lan wera.
   Ngulonaken maning ketemu Cungking. Panggonan hang paling sintru. Uwite asem dhirik ring pinggire dalan.
   Dalan Perliman hang mbingungaken iku, hang nuju ring setasiyun SS lan Inggrisan Post, Telephone and Telegraf (PTT), akeh wong hang bingung kepaling. Karep nyang Tegal Loji ketemu Tukang Besi Pecinan. Lare-lare cilik padha wedi kapan diajak nang Pecinan, merga akeh singkek wadon hang sikile buntek-buntek kaya lare cilik.
   Tegal Loji ngarepe Inggrisan sunut lan angker, merga sak utere Tegal Loji, umahe penggedhe Landa, umahe Sekaut, umahe Regent (bupati), kantor PTT. Loji njaba hotele wong Ĺanda, benteng Utrecht lan umah Pegadeyan.
   Kapan kepingin nyang Boom, kudu nunggang dhongkar, merga ning Boom akeh manol hang nepaki gedhang nyang kapal Cunia digawa nyang kapal gedhi hang mandheg ning tengahe segara.
   Gedhang-gedhang iku diuwot sepur, melebu nang gudhang. Hang uwis mateng, dibuwang nyang dalan, dijuwuti manol lan lare-lare. Sak nalika iku Banyuwangi diarani Kota Pisang.
    Hang diwedeni lare-lare dudu manol hang dhemen nguwel taping wong hang kelambiyan sak karepe dhewek. Lanang wadon kemul-kemul sarung.
   Kapal Cunia lan perahu wong Bugis padha dhirik ring pinggire Boom Meneng. Hang ning pinggire Boom Ombak (Selat Bali) mung kapal gedhi ning tengahe segara.
   Kapaĺ bout hang ning ngarepe Sahbandar husus kanggo uwong-uwong hang menyang Bali lan lare Bali hang sekolah ning tanah Jawa. Aju uwong-uwong Banyuwangi hang karep nyang Bali nunggang perahu katir. Cepet lan enak, milu lakune arus lan angin.
   Ning Kampung Mandar, pinggire Boom Meneng, ana Gudhang Kapuk, nerima kiriman teka kapal, bal-balan akehe. Adhep-adhepan ambi Gudhang Kapuk iku, ana panggonan uwong-uwong nakal, manol ngedhang lan wong Bugis, hang mulih lan hang melaku-melaku soren.
   Aran Gudhang Kapuk, dadi unen-unen hang sing enak dirungokaken kuping, yaiku panggonane uwong-uwong lanang mampir lan ngaso. Hang aran gudhang ning Banyuwangi mula duwe unen-unen hang sing enak kanggo kahanan kutha. Merga ana maning Gudhang Kopra ning Tukangkayu hang nampung kopra, emeh padha karepe ambi Gudhang Kapuk, anane panggonan lare wadon nakal kaya Gudhang Kapuk.
   Saben soren, uwong-uwong wadon mau nunggang dhongkar keliling kutha puter kayun. Pamer awake pupuran, celakan, lipenan nganggo kebaya, gelungan gedhi-gedhi. Mung dhongkare sing akeh lan dawa kaya puter kayun lebaran.

Hasnan Singodimayan.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Hasnan Singodimayan, Enam Mata Tentang Banyuwangi

Editor: Antariksawan Jusuf