Bekamal Kuliner Using kang Emeh Ilang

HENI KURNIAWATI (dipublikasikan pada Sabtu, 05 Agustus 2023 07:20 WIB)
- Kuliner

Akeh panganan has Using Banyuwangi kang wis kesuwur nggadug negara manca. Taping ana siji panganan asli Using kang wis sing pati tumon diedol matenge ring warung sega. Anane mung diedol mentak ring warung-warung. Malah wong Using dhewek ana bain kang sing weruh nyang aran Bekamal. Mula panganan siji iki wis akeh kang lali. Taping kanggo kang doyan, Bekamal mesthine tetep dadi panganan paling enak nomer siji.

Bekamal digawe teka ati sapi kang dirageni lan diinepaken (difermentasi). Merga nggawene suwi, bekamal iki regane rada larang lan melebu panganan mewah utawa istimewa kanggo wong tani utawa masarakat biyasah.

“Jare cerita, kawitane iku wong-wong bengen kadhung duwe gawe ngawinaken, nyunati yara mbeleh sapi, yaiku serang akehe iwak (daging) sapi temune direka-reka olahe makene keneng dilawasaken. Jaman bengen madak ana kulkas. Atine sapi mauka dirageni, ditutup rapet, diinepaken sepasar, aju dipepe sampek sod banyune, dadi bekamal wis”, jare Rasuli pedagang lan tukang gawe Bekamal ring desa Kemiren.

Saiki arang uwong nggawe Bekamal. Merga jaman saiki uwong pating duwe kulkas. Daging lan ati sapi bisa diparoti rada lawas. Mulane wong-wong saiki sengka nggawe Bekamal. Taping kanggo wong tuwek utawa kang doyan sing kira ninggal olah Bekamal kanggo acara-acara penting kaya lebaran, selametan, lan liya-liyane. Sing kathik ruwed nggawe, bisa tuku bekamal mentak nyang pedagang.

Bekamal bisa diolah paran bain, sak sire kang olah. Salah sijine olah Bekamal yaiku diragi bawang. Bekamal diiris cilik-cilik, diekum ring wedang, aju dietus. Bawang abang, lobok litik, ranti digerus, dioseng-oseng, Bekamal diceburaken. Ditambahi banyu saklumur, diuled, diolah sampek mateng. Iku ragi sakmajase kanggo wong medhok. Rika bisa bain nambahi ragi sakkarepe. Malah kanggo wong medhok kang sing sangu ragi, bekamal cukup diopor bain sing kathik tambahan ragi. Ditutulaken sega anget, windhul wis.

Carane nggawe Bekamal, kawitan ati sapi dikumbah sampek rijig. Diuled ambi uyah, gerusan bawang putih, diwadhahi ditutup rapet, diinepaken limang dina-limang bengi. Dikelanthang ring panasan ambi diwolak-walik garinge makene rata.  

Madhang jangan Bekamal bisa nambani kangen nyang jaman bengen, jaman-jaman bangete mangan Bekamal bareng ambi keluwarga kang saiki adoh ring kana utawa keluwarga kang wis sing ana umur. Rika bisa nyacak nggawe Bekamal dhewek utawa kepingin kang gampang tuku ring pedagang tukang gawe Bekamal.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.