Anggitane: Antariksawan Jusuf
(Minggu, 28 Juli 2024 08:24 WIB)

(Cerita Cendhek) Mulih

(Cerita Cendhek) Mulih

Dianggit ring Nur Holipah

Ring pucuke tilpun, seru ciyute atine Mak Tik tepak rungu suwarane Adon ngewartakaken gok Anang warang sampek sing arep madhang. Merga sak warang-warange Anang, masiya sega sak puluk magih gelem mangan. Golet tambane paceke pijet ning Mbah Jumanah, ngombe jamu, utawa digeningaken sedina rong dina bisa waras. Warange merga umure wis akeh. Wis tuwek.  Sipat warang, Anang nggarai gupuh hang seger mergane dhemen celuk-celuk hang wis singana. Dirungokaken seru nyekakeni.

Mak Tik maksa gok Anang kudu digawa merene, ngalor.

“Ning kidul Isun sing bisa saben dina weruh Apak, Mak. Sing bisa kecal-kecul pisan, pegaweyan bisa dhedhegan morat-marit. Dhung Apak ning kene yara Isun bisa nyambi, masiya ambi olah-olah pesenane uwong. Sedhilut nginguk-sedhilut nginguk bisa. Kadhung Apak sing arep madhang digu, Isun saya kepikiran ring kene,” ucape Mak Tik, keranta-ranta.

 “Isun emong! Kelendi jare uwong?” Adon semaur, nulak.

”Dadi repot jare uwong, Ndika niki Mak! Apak niku sakit, Emak niki gandhengane,” jawabe Mak Tik, serange wis kudu-kudu mapag Anang digawa ngalor.

”Yong ning kene ana adhik-adhikira,” ucape Adon, magih sing aweh. Rungu gedigu, Anang ya nulak. Merga sekaken nang anak-anake, gulakane saya ngeruwedi.

***

Dina Jemuah mari maghrib, montore Jonupik disewa kanggone mapag Anang. Mari bandel-bandelan, Adon wis sepakat gok Anang tirah merene. Adon ya milu pisan, iyane wis pamitan nyang Adon Harisah sing milu matun sulung.

Rupane Anang katon acum, diterak kulite hang kisut. Longong, matane jelekong. Wis gering, saya katon gering. Dicemak awake kerasa panas. Sambatane angger-angger, boyoke jare lara. Anang dipanggonaken ring kamar ngarep, umahe Mak Tik. Cendhela digeningaken ngemblang. Anang jemujung sing gelem diselimuti. Dienggoni kaos kaki, diuthak maning. Bantalan rada dhuwur, kiwa tengen didhang-dhangi guling. Kadhung biyasahe ngombe nggelogok dhewek, iki leren didulangaken nganggo sendhok. Anang wis sing kelar nggegem gelas, nyalinga gedigu, njejegaken awake leren ditahan makene sing rubuh.

Taping Anang wis gelem madhang, akehe sepuluk rong puluk. Paran penjaluke, age-age Mak Tik nggoletaken. Kaya arep kukusan sawi ambi godhogan energen. Dudu arep hang nyeremuh.

Emak, apak lan adhi-adhikisun bolak-balik ngulon nyang umahe Mak Tik. Cangkeme mingkem rapet, lambene sampek rada garing. Sepisan-pisan ndenguh kala ngingser awake. Merga sambat gok boyoke nemen larane. Anang wis sing pati bisa nenger sapa putune. Ditekani, ya mung nulih sak tulihan terus temungkul maning, utawane manthuk terusane ambi njaluk sepura ring lisane hang wis sing pati keca.

 Ulih telung dina, Anang digawa periksa. Acake makene weruh paran setemene penyakite Anang iki. Gadug ring dhokter Claudia ring Gentengan kana, Anang dijaluk kon nggawa nyang Rumah Sakit bain. Serta digawa nyang Rumah Sakit, Anang diperiksa nawi tah ana darah rendah utawa penyakit hang kaya ana ring jaman saiki, akeh maceme. Temakena kabeh normal. Mula Anang sing tau duwe riwayat penyakit paran-paran. Anang terus diweni obat enggo nyuda panas awake, lan rasa linu ring boyoke makene rada aron.

Obat hang diuweni dhokter diombekaken, mulane Anang rada enak turune. Sing kaya kawitan teka, saben bengi magih nderini-nderini.

***

 Genep ulih seminggu, lisane Anang saya ngelantur.

”Kendhalinisun iki meh pedhot wis...” lirih ucape wis sing pati keca. Mak Tik ambi ndulang bubur, kerasa semendhal atine. Obat hang diuweni dhokter wis entek. Karepe nak digawa maning, kanggone periksa.

”Ngomong paran sih Apak iki?” Saure emakisun.

”Adus.... Isun arep adus,” ucape Anang maning.

”Pak, wau empun siram. Panas-panas ngeten siram mboten apik,” alasane Mak Tik. Panas cemiklak ring njaba.

”Banyune entek dienggo umbah-umbah Kang Ajin,”  abane Adon, menging.

”Kudu adus Isun... Celukena Ali.. Mulih. Ayo mulih,” ucape Anang terus-terusan njaluk mulih. Ambegane Anang ngangsur-angsur.

"Nginum Pak?" Emakisun nawani. Anang manthuk. Awake Anang dilungguhaken, boyoke teka mburi dicekeli. Arep diselehaken maning awake, Anang kelaran.

”Adhuuuuh,” awake gemeter, cangkeme terus mingkem rapet. Matane cengeng sing ubah. Tangane nggegem kaku.

”Pak, Apak....,” Mak Tik nyeluki Anang. Merga kaya sing sadhar, taping melek. Iluhe Mak Tik mberebes mili.

”Dhik, juwutena Quran, Dhik,” abane Mak Tik nyang emakisun. Tangane Anang sun cekeli makene sing nggegem kaku.

”Nang... Anang,” celukisun ambi lungguh ring tengene.

”Hang anter Tik, ngajekena Anange. Engko tah yara dhemen.” Setemene isun paham, Mak Tik nggedhekaken atine. Sing bisa muni anter ulihisun ngaji merga diterak banyu mata hang cicir ngepusi pipi. Ciyut temenan atinisun, nulih Anang.

”Ali... Wis teka tah Ali? Mulih... Mulih bain,” anang balik sadhar, magih ngomong njaluk mulih.

”Ali ning dalan Pak... Enggih, wangsul,” jare Mak Tik ngapusi.

Bangete tengah dina, ngarepaken wayahe wong Jum'atan, Mak Tik balik nyeluk Jonupik kanggo ngateraken Anang mulih ngidul. Kang Ali ditilpun sing agage semaur. Anang wis sing kanti nganteni.

***

Anang wis gadug. Gadug Bades, bangete wong magih khotbah ana ring masjid. Sak mudhune wong Jum'atan kabeh padha mara nyang umahe Anang. Umah cilik dadi supek merga ebek wong teka ngewartakaken. Anang ana ring kamar magih dingajikaken Yaa-Siin. Mak Tik, emakisun, Kang Ali lan Kang At wis lungguh mubengi awake Anang.

Sing sepira suwi, Anang dipapag. Wis wayahe kanggo mulih. Sing ana hang sing ngerasa kelangan, kabeh padha tangisan.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.