Anggitane: Antariksawan Jusuf
(Minggu, 10 November 2024 09:42 WIB)

(Cerita Cendhek) Resepe Mbok Satemah

(Cerita Cendhek) Resepe Mbok Satemah

Dianggit ring Abdullah Fauzi

Keluwargane Mbok Ningsih duwe rewang arane Mbok Sat. Aran asline Satemah. Mbok  Sat iku putune Mbah Satun hang bengen uga dadi rewang ring embahe Mbok Ningsih hang arane Mbah Elok.   
   Keluwargane Mbok Ningsih iku dadi juragan turun-temurun, keluwargane Mbok Sat dadi rewang utawa pembantu uga turun-temurun. Ngepasi Mbok Sat, keluwargane Mbok Ning uwis padha melek teknologi. Sakat teka anake hang nomer telu arane Clara saben dina cekelane HP. Masiya tah wis umurane magih enem taunan.  Paran maning kakange hang aran Jeniver, sekolahe ring bangku SMP. Saben dina hang dietheng-etheng hing ana maning arane lap-top.
   Sedheng anak hang kawitan arane Yurica wis kuliyah semester enem ring Surabaya. Lakine Mbok Ningsih hang aran Kang Suradi saben dina pegaweyane ring ngarepe komputer merga dadi konsultan limang perusahaan gedhi. Loro ana ring Indonesia lan telu ana ring negara manca.
   Mbok Sat umure wis nggadug 50 taun. Taping sing tau lungguh ring bangku sekolah. Tau bengen, nalikane umur limalas taunan melebu-metu latare sekolah, taping ambi nyuwun nyiru isi gedhang goreng lan nyangking termos es lilin. Lare-lare sekolah padha mulih, Satemah milu mulih. Umur 16 taun dinikahaken ambi Kang Jum hang umure uwis 25 taun. Penggaweyane buruh menek uwit kelapa. Serehne saikine uwis umur 65 taun, wis sing kuwat maning buruh menek uwit kelapa. Dadi, sabendinane ya milu mangan ngombe ning Mbok Sat. Emane Mbok Sat iku uwong hang nurut lan neriman. Dudu merga belog, Mbok Sat mula turunane keluwarga hang nerima ing pandum. Mulane, masiya penggaweyane rewang, nyatane hang dienggo sedinane sing sampek kekurangan. Paran maning juragane ya keluwarga hang duwe pengerten lan ngeregani ring tenagane uwong liya.
   Nalika dina Rebo,  HP ne Mbok Ningsih hang nggelethak ring meja pojok ruang makan muni. Wangune ana hang ngebel.
“Mbok Sat, tulung HP iku angkaten Mbok!” abane Mbok Ningsih.
“Hu…..wedi Isun Mbok Ningsih,” semaure Mbok Sat.
   Mbok Ningsih hang magih nganggo belebedan andhuk metu teka cedhing. “Mbok Sat, wis pirang taun Rika milu Isun. Nerima tilpun bain wedi jare yah!”
“Engko dhong-dhonge diangkat, mbeledhos Mbok Ning!” abane Mbok Sat.
“Rika ya Mbok……kari kuna seru ak yuh!” jare Mbok Ningsih ambi gacar-gacar nerima tilpune.
   Mbok Sat nulihi Mbok Ningsih ambi setengah ngomplong aju mareki Mbok Ningsih edheng-edheng.
“Assalaamualaikum….!” Sapane Mbok Ningsih. Hang ngebel aju semaur “Walaikumussalaam…..!”
“Sapa iku Mbok?” takone Mbok Sat nyela.
“Halah Ndika iki. Mau dikongkon nerima sing wani…… Kelendi Beng kabare ring Surabaya. Apik-apik bain tah? Ha…. O.. ya biyasah gedigu iku wis…Iya…. Surabaya masa padha  ambi Banyuwangi….Terus ana kabar paran iki, isuk-isuk wis ngebel? O…..perlu ning Mbok Sat..ye…. arep ana kegiatan ring kampus…. Belajar nggelar kegiyatan kuliner dhaerah…Rencananira sak kancaan arep mbukak stan kuliner paran? e...Sega Tempong...Rujak Soto...hah, iya cocog iku Beng….Hah? Byek, emak masa paham resepe, Beng... O, iya…Mbok Sat lancar iku….O….iya wis, gesaha dhewek ambi mbok Sat….Mbok Sat…Mbok Sat….melayu ning endi uwong iku mau yuh?” abane Mbok Ningsih ambi gupuh nggoleti Mbok Sat hang sengidan ring mburine lawang pawon. Merga wedi kadhung dikongkon nerima tilpune.
“Mbok Sat…..Iki momonganrika kepingin takon-takon masalah Sega Tempong lan Rujak Soto!”
“Hah…..ya cocog iku….Kadhung Sega Tempong ring Bik Wah Bakungan enak……Kadhung Rujak Soto iku ring Mbok Tik Kepatihan…..Huuuu….windhul!” abane Mbok Sat sing ngerti juntrunge.
“Ngomong paran Rika iku Mbok? Iki Beng Yurica arep ana gelar kuliner ning kampuse. Beng Yurica sak kancane arep mbuka stan Sega Tempong ambi Rujak Soto. Tulung Mbok Yurica warahana teka HP iki. Beng….Iya iki Mbok Sat…. Video Call bain, Beng!” abane Mbok Ningsih ambi mbukak VC HP ne aju di sendhekaken ring morong tengah meja makan, Mbok Sat dilungguhaken ring kursi makan ambi ngadhepi VC teka Yurica.
“He….Beng, masaalah….kelendi kabare……. Sambel gerang terine ika entek wis?” takone Mbok Sat.
“Entek wis Bik……Gedigi…..Emak mau wis nyampekaken ra? Isun warahana kelendi carane nggawe Sega Tempong lan Rujak Soto!” abane Yurica.
“Saiki? Byek…..aju Isun kapan berangkate nyang Surabaya?”  
“Using Bik…..Rika sing usah menyang Surabaya….Saiki iki  Rika ceritaa Sega Tempong iku bahane paran bain, carane olah kelendi……Gedigu bain yah!” jare Yurica ambi setengah munyik.
“Gedigi Beng. Sira tukuwa kangkung, kacang lanjaran, terong, gubis, manisah lan timun. Jangan-janganan iku kuluben. Taping timune aja dikulub pisan….ya…timune dienggo lalap. Sambele iku, teka lobok litik, tambahana lobok jawa, uyah, gula pasir, terasi lan ranti. Aja tomat ya Beng……ranti….iyok….ranti. Lha……iwake iku tempe goreng, tahuk goreng garing, dadaran endhog lan Gerang asin. Sedurunge digoreng, Gerang asine ekumen sulung ambi banyu leri. Ya…Makene sing kasinen. Kuwabueh (kabeh) iku matengena teka umah kontrakan, taping,  umanana terasi ambi Gerang asin…Hah.. Lha...engko kadhung pengunjung wis katon akeh hang teka, terasi hang magih mentak iku mangkat gorengen. Mari gedigu, gerang asine gorengen pisan…Gedigu!”
“Byek….lancar Ndika ya Bik……Ambune terasi digoreng utawa gerang asin digoreng yara semebrung merana-merana ya Bik…..nggarai weteng kemeruwuk…!” semaur Yurica.
“Lha…..paham gedigu, yah……candhakena engko wis, warungira diserbu pengunjung… hah…..iya….jeh, kene yah!” abane Mbok Sat.
“Terus Rujak Sotone kelendi Mbok?” takon Yurica.
“Byek…..ragade wakueh ya Beng!”
“Gedigi bain wis Beng.. Engko iki, Mbok Sat Sun jak nyang pasar, belanja ragade Rujak Soto. Belanjane bain engko Sun shooting. Sampek ditata ring meja pawon ya Sun shooting. Engko Mbok Sat peraktek nggawe Rujak Soto, Emak hang nyambung njelasaken. Kaya nggawe tutorial ika yah!” jare Mbok Ningsih. "Uwis gedigu bain, Beng?” abane Mbok Ningsih mungkasi VC an ambi anake.
   Mbok Ningsih hang saiki magih nggethu kuliyah nguber gelar S-3, emeh sabendina diundang forum-forum utawa panitiya-panitiya seminar kanggo dadi nara sumber masalah psikologi remaja. Nyatane, ditakoni masalah sepele, hang bisa njelasaken malah pembantu rumah tanggane, Mbok Satemah, hang sing tau ngerasakaken lugguh ring bangku sekolah. Pengeran Maha Adil. Menusa iku duwe kelebihan lan kekurangan. Hang rumangsa kurang ya aja methentheng kaya uwong bisa? Semono uga hang rumangsa duwe kelebihan ya aja meneng thok nalikane kelebihan ilmune kono mau dibutuhaken uwong liya. Siji lan sijine kudu bisa tulung-tinulung.    

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.