Dayu Prisma, Lare Banyuwangi Juwara Monolog Teater Nasional
Moh. Syaiful (dipublikasikan pada Sabtu, 07 Maret 2020 10:59 WIB)
- Tokoh

Dayu Prisma, lare wadon Banyuwangi hang dilairaken ring Sidorejo Kecamatan Purwoharjo, 12 Mei taun 1994 iki bisa menang ring Kompetisi Monolog ring Dramakala Festival-9 tingkat Nasional Tahun 2020. Monolog hang digawakaken yaiku: Kesaksian: Tumirah & Pembantaian Dukun Santet dadi salah sijine lakon teka 19 lakon hang milu kompetisi.
Dayu Prisma lulusan Sarjana Teater ISI Jogya tahun 2019 hang wis saklawase pitung taun iki pulet ring urusan teater "Kalanari Movement Teater" Yogyakarta dadi aktris iki bisa melebu lan ulih penghargaan Monologer Terbaik lan Piala Prita Dramakala Festival 2020 main lakon hang nyeritakaken pembantaian maut ring peristiwa dukun santet Banyuwangi. Monologe hang disutradarai Abi ML iki nyatane bisa nginggiraken peserta monolog liyane hang akehe 19 uwong hang teka kutha-kutha gedhe ring Indonesia.
Pentas ring Lakon karya: Adaptasi Tumirah (Sang Mucikari), Karya Seno Gumira A & Jurnal Jason Brown Perdukunan Paranormal & Peristiwa Pembantaian Teror Maut di Banyuwangi dipentasaken ring nomer urutan 14 ring Kampus LSPR (London School Public Relations) Transpark Bekasi. Kompetisi iku dhewek dianakaken kawitan tanggal 26 -28 Pebruari 2020. Sakdurunge Dayu Prisma uga wis koncar-kancir nggarap proyek ring Surabaya lan Yogyakarta ambi Abi ML sutradara teater teka Jakarta, nggarap isu bunuh diri "Sati" hang dielaborasi ambi bunuh diri masal para selire Prabu Tawangalun .
Kompetisi hang dianakaken saban tahun iki saktemene wis ana sakat Februari 2011, LSPR (London School of Public Relations) nganakaken “IDEAL-Dramaka Fest” dikarepaken nggawe panggonan kreatifitase para seniman teater makne bisa berkarya terus
Sakliyane nggawe IDEAL, LSPR uga ngelahiraken koran cetak “DRAMAKALA” hang isine informasi lan kabar-kabar babakan teater.
Dayu Prisma dhewek seru girange ulih penghargaan "Monolog Terbaik". Dayu Prisma aju ngabaraken beritane nyang reporter belambangan.com liwat Whatsapp. Iyane girang merga bisa nggawa aran Banyuwangi nyang pentas nasional paran maning iki kompetisi teater hang arang dipiloni wong Banyuwangi. Lan maning Dayu Prisma uga dhemen merga lakon hang digawakaken lakon hang diadaptasi teka cerita hang ana ring Banyuwangi yaiku Peristiwa Pembantaian Teror Maut, dukun santet tahun 1998 ring Banyuwangi. Sakliyane monologer terbaik. Kategori juwara liyane yaiku sutradara terbaik, aktor terbaik, drama pendek terbaik.
Rasa girang lan mongkoge nyang Banyuwangi tanah kelahirane iki diwujudaken kelawan ngedekaken komunitas teater nong tanah kelairane Desa Sidorejo Kecamatan Purwoharjo yaiku Studio Klampisan Banyuwangi ring tahun iki.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
Sumber : Kompetisi Taeter Nasional
Editor: Antariksawan Jusuf