Dikapak Gandrung Ngamen?

Antariksawan Jusuf (dipublikasikan pada Jumat, 18 Oktober 2024 09:31 WIB)
- Opini

Sorene maning isun dikirimi link youtube ambi sesepuh Ikawangi Pusat Pak Sumono Abdul Hamid, ipene menteri pariwisata dhongkol Pak Arif Yahya.
   "Iki kelendi, taun 1960an dilarang, saiki njumbul maning. Tandhane paran iki?" tulise Pak Sumono. Isine pideone ana wong nganggo kelambi gandrung ngamen ring pinggir lurung.
   Mula isun tau rungu teka ruwahe Pak Mitro, Pak Paat ngongkon pegawai Kesra Pemda menging ana gandrung ngamen sak dalan-dalan. Kadhung ana hang ngamen ring dalan diuber, dicathet informasine lan diwani panggonan lan wekas hing ulih ngamen.
   Bengen Pak Paat kepingin ngangkat marwahe gandrung. Gandrung bengene ya ngamen nong lurung-lurung sak perlu golet picis recehan. Ambi pak Paat dilarang lan gandrung dipanggonaken ring panggonan hang terhurmat.  Delengen bain kesenian Ondel-ondel ring Jakarta, hing ana ajine merga ngamen sak paran-paran.   
    Pak Paat uga hang ngangkat kesenian gandrung dadi duwe aran kaya saiki.  Ale bengen, wong-wong tuwek mesthi ngelarang anake parek-parek gandrung merga, gandrung iku wis mesthi donyane wong hang hing apik. Ana minuman keras lan lakune dhayoh-dhayoh ring pertunjukan gandrung hang hing perlu ditiru lare-lare cilik. Pak Paat malah ngongkon ruwahe Pak Mitrok nyiptaaken tari lan ngajari lalare cilik njuged tradhisional makene bisa ditampilaken ring pendhapa. Salah siji penarine malah anak wadone pak bupati. Teka kene, gandrung mangkat dilirik melebu sekolah-sekolah lan diajaraken nang lare-lare.
   Saiki gandrung dadi idola nang lare-lare. Sanggar-sanggar tari merujuk sak bajeg. Bandhingena, nong kutha liya, endi bisa ulih seragam tari sampek 5000 seragam? Anane ya mung Banyuwangi. Acake takona kanca nang Surabaya, kadhung ana tari Remo 1000 ana tah penganggone?    
   Hang milu seleksi Gandrung Sewu ana ewonan lare. Hang hing kepilih seleksi, ana wong tuwek hang gelem mbandhani anake makene bisa milu tampil. Pokoke anake bisa milu Gandrung Sewu.
   Balik maning nong gandrung ngamen, Pemda hususe Dinas Kebudayaan dan Pariwisata hang seperene ngurusi mati uripe gandrung, mesthine gancang mudhun ngelarang wong-wong gandrung ngamen. Aja sampek gandrung dicamah, receh lan hing duwe aji maning. Merga gandrung saiki wis dadi ikone Banyuwangi lan dadi duta Banyuwangi ring panggonan-panggonan liya, digawa diaspora Banyuwangi hang semebar ring propinsi liya sampek negara manca.
   Aja sampek ikone Banyuwangi mudhun regane merga mung ngarepaken picis receh teka ngamen sedawane dalan. Aja sampek.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.