Dony Suwandi, Menyang Kalimantan Ngelatih Kesenian Banyuwangi

Hasan Sentot (dipublikasikan pada Jumat, 08 Mei 2020 05:28 WIB)
- Tokoh



Suwene 12 taun dadi Guru Tidak Tetap (GTT) mulang kesenian ring SDN Watukebo, Blimbingsari, durung bisa dadi pertimbangan kanggone atasan ngakat dadi Aparat Sipil Negara (ASN). Sak durunge ning Watukebo, iyane tau mulang kesenian lan ngelatih lare-lare ring salah sijine Sekolah Dasar (SD) Tegaldlimo. Keahliane nabuh alat musik iku, kawitane belajar dhewek teka Kelompok Janger Agung Wilis ring kampunge. Sampek pungkasane dadi panjak tabuhan Banyuwangi, guru, ngelatih lan ngelesi lare-lare nyang tabuhan Banyuwangi. Iku sithik lakon uripe Dony Suwandi, S.Pd,  pawongan teka Dusun Kepatihan, Desa Kedaleman, Kecamatan Rogojampi.

Dony pancen pawongan hang gedhe tekade kanggo sinau, paran bain kadhung disenengi aju dipelajari sampek bisa. Kaya nabuh gamelan, masiya kawite mung gamelan Bali, aju milu ajar sampek bisa nyang gamelan Banyuwangi. “Malah isun serta wis rumangsa bisa, tau milu kelompok Angklung Caruk ring Gitik Kecamatan Rogojampi. Uga tau milu Angklung Bades, aju milu Sanggar Tari Sayu Gringsing pimpinane Subari Sofyan," ujare wong hang lair 12 Juli 1976 iki.

Kepenterane Dony nyang gamelan, ana uga hang ngawasi aju ditawani kon mulang lare-lare cilik. Dony akeh hang nggatekaken, merga iyane bisa pirang-pirang tabuhan Banyuwangi. Mulai angklung, suling, kendhang lan liya-liyane. Sing terima bisa nabuh, Dony uga melajari tabuhan mau teka sisi ilmu. Karepe, kadhung ana wong takon bisa njelasaken lan ana alasan kuat apuwa kudu gedigi, apuwa sing ulih gedigu.

“Jaman sakmono, isun aju ditawani kon ngelatih ring Kecamatan Tegaldlimo, komposisi tetembangan tingkat SD, alhamdulillah ulih Juwara 2. Teka prestasi iki, PGRI Tegaldlimo ngeweni kesempatan nyang isun dadi GTT (Guru Tidak Tetap). Pungkasane isun dijaluk ambi PGRI Rogojampi, kanggo tanggung jawab hang padha ngelatih lare-lare SD. Alhamdulillah ring Rogojampi iki, lare-lare hang sun latih sampek dadi Juwara 1 sak Kabupaten Banyuwangi," ujare Dony ngaku terus ngangsu ilmu tabuhan nyang wong-wong lawas.

Masiya ambi dadi guru sukwan, Dony tetep milu dadi panjak propesional. Wis pirang-pirang sanggar lan kelompok tabuhan lan kesenian Banyuwangi dipiloni. Dony uga seneng gesah tuwek, ngomongaken tabuhan Banyuwangi. Sing maido kadhung aran Dony akeh kenalane, utamane para panjak mulai teka eloran sampek Banyuwangi kidul. Durung maning sekolahan lan wong tuwek hang kepingin anake bisa tabuhan, akeh hang mercayakaken dilatih Dony.

“Tanggal 18 Juli 2018, Isun dijaluk ambi Ketua Paguyuban Keluarga Besar Banyuwangi ring Kutai Kertanegara, yaiku H. Budi Harsono, ST MT, kanggo ngelatih tabuhan ring sanggare hang ana ring Kutai. Iki kanggonisun tantangan hang abot, merga ngelatih lare-lare SD sampek SMP asli Kutai belajar tabuhan Banyuwangi. Alhamdulillah, liwat Sanggar Seni Sritanjung Kutai, suwine telung minggu, lare-lare mau mulai kenal sampek saiki wis bisa nabuh gamelan Banyuwangi," jare Dony hang pancen duwe bakat gedhe ngulang utawa muruki lare-lare cilik.

Dony aju mulih maning nyang Banyuwangi, merga tanggung jawabe dadi Guru SD ring Watukebo ambi operator sekolah. Namun sing elet suwe, H. Budi Harsono ngundang maning Dony teka nyang Kutai, suwene preian sekolah. Merga suwene sak ulan, Dony mesisan ngajak rabine kanggo mboro nyang Kutai.

“Alhamdulillah, teka program latihan kaping pindo iki asile nyenengaken. Mulane aju H. Budi Harsono nawani isun kanggo megawe lan manggon ring Kutai bain, mesisan ambi ngelatih terus-terusan ring Sanggar Seni Sritanjung. Isun ditawani megawe ring Kebun Kelapa Sawit, ambi bayaran lumayan lan adoh dibandhing dadi guru sukwan. Paran maning arep njagakaken dadi Pegawai Neger Sipil (PNS) uga sing kira, ambi tambahe umur wis ngelebihi wates umur hang ditamtoaken Pemerintah. Pungkasane ajakan H. Budi Harsono mau sun terima, masiya ungkur-ungkuran anatarane pegaweyan ambi hang isun bisani, yaiku kesenian," jare Dony nguweni alasan.

Dony modele uwong hang sing bisa meneng, ana waktu sithik hang longgar mesti diisi ambi kegiyatan liyane hang ana guna mampaate. Masiya megawe ring Kebun Kelapa Sawit lan ambi ngelatih tabuhan, iyane magih kober mbukak toko dodol alat-alat tulis ambi mbukak jasa Desain Grafis. Kegiatan tambahan iki bisa keneng dienggo celengen, ambi tambahan pengasilan. Ilmu iki diduweni Dony tepak ana ring Banyuwangi, merga iyane sing tau lali ambi laptope.

“Ring sanggar Isun kan sewates ngelatih lare-lare, ambi nularaken ilmu hang isun bisani. Muga-muga Gusti Allah ngijabahi, kadhung ana rejeki Isun kepengin mbisuke megawe bareng (kolaborasi) antarane Tabuhan Banyuwangi ambi Tabuhan has Kutai Kertanegera, yaiku Tingkilan. Angen-angen ini kayane tangeh lamun, naming kadhung hang Kuawasa nguweni idin, dalan kebukak teka endi parane hang sing kenyana-nyana. Amin," pungkasane Dony ambi nyawang ring awang-awang.

PROFIL

Aran: Dony Suwandi, S.Pd

Panggonan lan tanggal lair : Banyuwangi, 12 Juli 1976

Pendidikan: S1 PGSD

Pekerjaan: Wiraswasta

Alamat ring Banyuwangi: Jl. Srono dsn. Kepatihan Rt. 01 Rw. 02 Ds. Kedaleman Rogojampi

Alamat anyar: Jl. Usaha Tani Kejawi Rt. 01 Ds. Rapak Lambur Kec. Tenggarong

 

 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf