Dr. Taufiq, Magih Kepingin Nggelar Festival Angklung

Antariksawan Jusuf (dipublikasikan pada Jumat, 16 Juli 2021 13:30 WIB)
- Tokoh



Lahan tepat untuk iklan anda di sini.

Hubungi: skb@belambangan.com atau WA telp 0811843457


Paran digawe dokter Taufik Hidayat, MKes- SpAnd (K) sak uwise pangsiun minangka Aparatur Sipil Negara (ASN) lan wurung nyalonaken dadi bupati?
"Isun magih ngimpi bisa nampilaken festival angklung caruk," jare dokter Taufiq Hidayat ring klinike hang ana ring Genteng, Banyuwangi.
   Saiki mula wektune akeh dienggo bakti ngembangaken klinike. Hang kepisan Amour 1 ana ring Benculuk, wis melaku lan wis bisa nampa sampek 25 pasien sedinane. Aju Amour 2 hang ana ring elore kantor kecamatan Genteng ya setemene wis rame, naming magih perlu dikembangaken maning. Impene, mbukak Amour 3 ana ring kutha, lan bisa nerima pasien teka manca negara, kaya hang ana ring Bali. Kabeh pegawene ya kudune bisa basa Inggris. "Merga tambah akeh hotel kelas internasional ring kutha Banyuwangi."
   Sak liyane nggedhekaken klinike, dokter Andrologi spesialis seksual lan kesuburan wong lanang iki saben Senin sampek Kemis, ngantor pisan ring Rumah Sakit NU hang ana ring Mangir, Rogojampi.
   Kadhung masalah ilmu, dokter asal Pengantigan iki wis tuwuk sekolah. Sampek mucit. "Ketuwuken malah," jare dokter hang tau dadi direktur ring RSUD Blambangan, RSUD Genteng lan RSNU Mangir. Pendidikan S1 lan S2 ring Universitas Airlangga Surabaya sampek njuwut spesialis minangka pendidikan konsultan hang dilantik Konsorsium Andrologi taun 2019, enem ulan sedurunge pangsiun. Iyane uga tau milu kuliah seksologi ring Denpasar, tingkat dasar sampek tingkat lanjut.
  Bengene tau tugas nong Kalimantan, aju balik teka kono taun 1990. Dokter kelairan Banyuwangi taun 1962 iki, nggawe akeh terobosan hang mbela masyarakat. Terobosane mauka hing mung diakoni rakyat Banyuwangi dhewek, naming uga ring tingkat nasional lan malah internasional. Umpamane "Lahir Procot Pulang Bawa Akta" hang ulih penghargaan medali emas tingkat provinsi Jawa Timur (2015), medali emas tingkat nasional (2016) lan tingkat internasional ring Manila (2017).
Gagasane liyane "Akta Kelahiran Terbit 24 Jam" uga diganjar Bappenas ring acara Indonesia Development Forum 2019.
Programe hang katon nyata paedahe kanggo wong cilik yaiku program Gandrung, yaiku Gerakan Asuhan Nyata Disabilitas, Resiko Tinggi, Usia Lanjut, Veteran Pensiun dan Gravida.
   Taping masiya keahliane dadi dokter, uripe hing adoh teka kesenian merga sakat bengene dhemen nyang kesenian tradisional. Hing maido iyane tau dipilih dadi ketua Dewan Kesenian Blambangan (DKB) masiya sedhilut.
"Kanggonisun, aktip minangka seniman iku kelawan nguripi seni lan budaya Banyuwangi. Kadhung dudu wong Banyuwangi hang duwe welas, sapa maning?"

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor