Dulure Gedhang Goreng

Muhamad Novi Yusuf (dipublikasikan pada Sabtu, 28 Mei 2022 09:50 WIB)
- Kuliner

Sapa hang sing weruh nyang aran jajan gedhang goreng? Nong endi bain mesthi ana wujude jajanan iki, embuh nong wong dodolan gorengan, dodolan nong kampungan, ana hang olah tepak ana selametan. Paran maning kabeh uwong mesthine bisa nggawe, akeh pisan hang dhemen olahan jajanan iki. Malah saiki gedhang goreng wis munggah pangkat diedol ring retoran lan rumah makan kelawan tambahan soklat utawa diuwur-uwuri parutan keju. 

Ring Banyuwangi, ana salah kaprah hang nyebut gorengan macem-macem kelawan aran gedhang goreng. Gedhang goreng duwe dulur. Nawitah jajan liyane ana, isun durung nyaruki, hang ana buru kawitan yaiku gedhang goreng iku ana dulure. Isun dhewek wis neliti ring saben wong-wong tuwek nong desanisun ya temakaken mula akeh dulure jajan gedhang goreng iku. Embuh lair teka endi, sapa hang ngarani magih durung weruh. 

Hun duduhaken dulure gedhang goreng siji-siji yaiku:

1. Gedhang Goreng Sabrang

Gedhang goreng Sabrang iku ale tepak olahe utawa tepak disuguhaken ya hing ana campuran uwoh hang aran Gedhang. Masiya tah gedeboge utawa godhong gedhange ya using. Naming gok ana aran gedhang goreng ring ngarepe. Dhung diteliti cara olahe sakat kawitan yara mung bahane teka sabrang. Hing ana liyane maning, taping dhung wis digoreng ambi gelepung hang wis dirageni gok arane hing gorengan sabrang kaya dene gorengan sawi nyeluke. Isun dhewek magih hing paham sampek seprene.

2. Gedhang Goreng Suun

Paran maning iki, ihun ya weruh dhewek dhung emak utawa adonisun olah ya mung terima woh hang aran suun bain hang wis dirijigi aju diceburaken nong adonan gelepung hang wis dirageni mari digu digoreng. Hing ana bahan liyane maning hang diceburaken, kaya sabrang mauka ya hing dicampuri gedhang naming dhung wis mateng arane ya uwah. Njumbule ya gedhang goreng suun.

3. Gedhang Goreng Tape

Gedhang goreng tape pisan, ya mung tape hang digoreng ambi gelepung nong lenga hang panas. Mari digu disuguhaken ya arane ana gedhang gorenge nong ngarepane tape. Tapene dudu tape hang teka ketan naming tape hang digawe teka sawi. Taping ya kelendi maning aran wis celukan hing bisa diubah kerana wis dadi basa sedina-dina. Taping ana pisan wong hang ngarani gedhang goreng tape iki: randha royal.

4. Gedhang Goreng Sabun

Dhung iki unik, isun kekel dhung mbahas aran jajan gedhang goreng sabun. Tepak kuliyah bain isun tuwuk nganjerahaken jajanan iki nyang kanca-kanca kuliyahisun hang Jawa utawa teka njaba Banyuwangi. Isun juwari peromosi kerana arane bain wis nggawe uwong mikir ping telu ping papat bahan hang digawe jajan iku mauka. Alae dhung dipenthelengi yara mung gedhang sale bain bahane. Hang mari digu digoreng. Akeh hang padha kaju uga kekel rungu isun nyebut aran jajan iku mauka nganggo sebutan gedhang goreng sabun. Isun tau takon nyang emake kancanisun hang bengen nduduhi isun jajan hang aran gedhang goreng sabun iku. Naming uwonge hing bisa njelasaken mung terima  ngomong kadhung arane iku wis teka jaman bengen hang diedhunaken nong anak putune.

Turneya kaya sabrang, suun, tape sawi, ambi gedhang sale mung terima digoreng digu bain ambi gelepung hang wis dirageni nong lenga hang panas, naming gok uwong-uwong padha nyeluk nganggo aran gedhang goreng nong ngarepe.

Isun sampek bingung uga ya munyik-munyik dhewek dhung ngenget-enget olahan jajan iku. Nawi ya wis tulise aran gedhang goreng bisa nduweni dulur hang padha-padha digoreng.

Hang penting jajan iku terusa lestari paran maning aran celukane hang aneh bisa nggawa manpaat ring dina mburine.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.