Endhog Cit
Hani Z. Noor (dipublikasikan pada Sabtu, 15 Mei 2021 10:26 WIB)
- Kuliner
Endhog Cit salah siji olahan hang wis seru anjerahe ring Banyuwangi.
Bisa dipangan ambi pecel, janganan bali ontong, paceke ana ring sega bungkusan utawa dadi sandhingan jangan liyane. Wayah lebaran biyasahe akeh pisan wong olah endhog cit iki minangka sandhingan jangan santen-santenan.
Dina iki nak ngedum resepe caranisun, muga cocog lan keneng dicobak.
Bahan hang dibutuhaken:
Sekilo endhog pitik
Banyu secukupe
Lenga keletik dienggo nggerengseng
Ragi hang digerus alus:
Limang siyung bawang putih
Pitung bungkul bawang (abang)
Sak jempol jahe
Sepuluh iji lobok litik (kadhung dhemen pedhese rada seru bisa ditambahi, kadhung sing pati dhemen pedhes bisa dikurangi)
Merica kira-kira rongpuluh iji (kadhung sing pati kuwat pedhese merica bisa dikurangi, kadhung dhemen rada landhep rasane ya bisa uga diakehi)
Telung iji kemiri, perlune makene ragine rada kenthel lan ngelenga gurih. Bisa pisan diganti ambi santen kenthel kira-kira telung sendhok sampek limang sendhok mangan. Bisa pisan sing kathik kemiri utawa santen.
Ragi liyane:
Kecap manis telung cinthung cilik
Godhong salam telung lembar
Godhong jeruk purut limang lembar
Sere sak lonjor hang rada gedhi dikeprek
Cukak rong sendhok mangan, iki perlune makene endhog bisa lebih padhet lan atos kenyil-kenyil
Petis cemeng setengah sendhok mangan, digaluh ambi banyu panas makene gampang kecampur ring ragi liyane. Kadhung sing dhemen, bisa hing kathik petis
Uyah secukupe
Gula secukupe
Carane olah:
Endhog hang wis dirijigi digodhog sampek mateng aju dikenceti.
Siyapaken banyu ring wajan, tambahana kecap rong cinthung jangan ambi cukak rong sendhok mangan, digaluh sampek rata.
Sere hang dikeprek sedurunge ambi godhong salam cemplungaken pisan.
Kabeh iku mau digodhog. Kadhung wis gemulak aju lebokaken endhog hang wis dikenceti mauka.
Godhogen ambi sepisan pindho diwolak-walik makene kelire rata lan sing gempung.
Digodhog sampek banyune emeh asat lan endhoge wis rada cemeng utawa soklat tuwek.
Saksuwene endhog digodhog mau, gerusen ragi liyane sampek alus, tambahana jeruk purut aju digerengseng.
Kadhung wis arum aju cemplungaken endhog hang wis soklat mauka.
Tambahana kecap sak cinthung cilik ambi petis hang wis dienceraken nganggo banyu panas mauka.
Aja lali nambahi uyah lan gula, tilikana rasane, becikaken kadhung ana kurange.
Kadhung ragine wis ngeresep ring endhoge lan wis rada kenthel nyemek-nyemek, tambahana lenga telung sendhok mangan, galuhen sampek rata.
Kadhung wis rada meletik-meletik, tandhane endhog cit wis dadi lan siyap dirahabi
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.