Es Pingu lan Kolak Pelangi ala Mbok Gendisss

Nur Holipah (dipublikasikan pada Sabtu, 16 April 2022 08:27 WIB)
- Kuliner



Mbok Gendisss duwene Mila Dwi Wulandari iki, wis ana lan resmi arane sakat taun 2015. Mula sakat magih sekolah ring SMKN 1 Banyuwangi (2010-2013), Mila—celukane—angger megiyet lan tangane mula kreatip. Kala semana kerep gawe bros teka flanel, jajan karakter, lan liya-liyane. Sampek seperene iki saya rame usahane. Diweni aran Mbok Gendisss merga iyane nerima pesenan olah-olahan manis kaya donat, jajan bakaran lebaran kaya nastar, red velvet, uga cake utawa tart karakter hang regane ya magih keneng dijujug. 

Tepak puasa gedigi, temakaken Mbok Gendisss ya olah maceme matengan (lauk pauk) hang uga bisa rika tukoni. Menu matengane Mbok Gendhisss akeh maceme, kaya tah endog Balado Rp. 12.000, Acar Iwak Tongkol Rp. 10.000, Capcay Rp. 13.000, Pincuk Iwak Keleng Rp. 10.000, Jangan Lodeh Rp. 5.000, Opor Labu Siam Rp. 5.000, Endog Dadar Bumbu Rp. 10.000, Gimbal Jagung Rp. 5.000, Rempah Lemuru Rp. 10.000, Pelasan Tongkol Rp. 7.500.

Taping, hang dadi primadona angger puwasa teka Mbok Gendisss ya Es Pingu lan Kolak Pelangi. Wis anjerah kanggone uwong-uwong hang puasa, buka puasa nyandhak es-es-an sulung. Sedina jampleng ibadah nahan elom lan ngelak. Gorokan hang asat diileni banyu es, seger rasane. Umume es kerai seulan jampleng dadi menu ombenan hang gampang ditemoni merga ya akeh hang jaja. Naming, apan wis kuweleh serbet krai, Es Pingu lan Kolek Pelangi olahane Mbok Gendisss dadi pilihan.

Es Pingu setemene bain Es Pisang Ungu, emeh padha ambi Es Pisang Ijo. Taping hang marai bidha ya gedhange hang diselimuti adonan tepung beras hang dikelir ungu. Kelir ungu asale teka sabrang ungu.

Ring gelas ditap sap-sapan: paling ngisor diweni bubur sumsum putih, aju dietap pisang ungu hang wis ditugeli, aju diisine es batu. Disiram nganggo sirup abang, lan dikeceri susu kental manis. Segere es pingu kaya-kaya wis gadug lak-lakan.

Kadhung Kolak Pelangi isine ya ditap sap-sapan kaya dene Es Pingu.

Paling ngisor diiseni bubur mutiyara kelir kapuranta, diweni gedhang lan sabrang kukus hang wis ditugeli, diweni kolang kaling kelir abang lan ijo. Pungkase, disiram ambi banyu santen. Anget-anget cocog. Diuweni es batu ya enak.

Regane Es Pingu lan Kolak Pelangi iki murah seru. Mung enem-ewu-an! Picis sepuluh ewu wis ulih segelas Es Pingu utawa Kolak Pelangi. Magih nyusuk. Kari milih bain, rika dhemen hang endi.

Liyane nggelar dhasar ring umahe dhewek hang ana ring Jalan Tarakan nomer 7 Lateng (kidule Kukuh Photo Studio), olah-olahane Mbok Gendisss bisa rika temoni ana ring stand Ramadhan Jl. KH. Agus Salim ambi ngerandhu buka.

Kadhung rika kepingin pesen-pesen bisa tilpun nyang WhatsApp 089-515-774-293. Kadhung nak kepingin weruh asil olah-olahane Mbok Gendisss, rika ya bisa ndileng ning akun instagrame @homemade_mbokgendisss

Enget ya, Mbok Gendisss. Nganggo s telu. 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Dokumen Pribadi

Editor: Antariksawan Jusuf