Es Pisang Ijo Pak Brengos

Nur Holipah (dipublikasikan pada Sabtu, 23 Juli 2022 08:30 WIB)
- Kuliner



Kadhung maca ring Google Wikipedia, jare Es Pisang Ijo asale teka Sulawesi Selatan utamane ring Makassar, suku Bugis kana. Taping sing kaget umpama rika nemoni es iki ring dhaerah endi bain.

Teka arane bain wis katon, dak es iki nganggo gedhang. Ana tah gedhang kelire ijo? Ana. Kabeh gedhang hang mentak kulite yara ijo. Hehe. Hing gedigu. Es Pisang Ijo hang dimaksud ring kene merga gedhange dibungkus ambi adonan gelepung beras hang wis dikelir nganggo peresan godhong pandhan ijo/suji hang digejah. Apuwa sih kelir ijo? Temakaken, wong Bugis Makassar milih kelir ijo merga nduweni tenger kelir hang nduduhaken kesakralan, kesucian hang bisa ngewani rasa adhem lan tenterem.

Tepak Ramadan, es Pisang Ijo umume dadi takjil kanggo buka puwasa. Sunnahe buka yara kudu digancangaken lan dikawiti kelawan takjil hang manis-manis. Liyane iku uga merga sak porsi Es Pisang Ijo iki ya bisa maregi.

Lahan tepat untuk iklan anda di sini.

Hubungi: [email protected] atau WA telp 0811843457


Masiya sing Ramadan, rika tetep bisa ngerasakaken sak jembung Es Pisang Ijo duwene Pak Brengos hang ana ring Gentengan (Jalan MH. Thamrin).

Panggonane sing kariya nyelempit  taping kala-kala bisa kelarad dhung durung tau weruh. Kadhung rika teka Penataban, gadug pertelon Giri (klinik dr. Naufal Baraas), biluka nengen ngetanaken sampek ngeliwati Warung Pakdhe Panjang Jiwo. Ngetanaken terus sampek gadug panggonane wong adol helm. Warung Es Pisang Ijo Pak Brengos ana ring kidule dalan (adhep-adhepan ambi Langgar Al Ikhlas utawa Raja Gypsum). Warunge ana ring kidule dalan sak wetane gapura Perumahan Griya Permata Husada. Dhung rika teka wetan, Kedai es Pisang Ijo Pak Brengos iki sak uwise kuburan Bendho.

Sak jembung Es Pisang Ijo Pak Brengos iki mung rega nem ewu bain. Sing usah kathik nunggang perahu nyaberang nyang Sulawesi, rika wis bisa nguyup segere Es Pisang Ijo. Hang ndhemenaken teka es Pisang Ijone Pak Brengos salah sijine merga iyane angger nganggo gedhang Raja Nangka, gedhang Kayu lan kala-kala uga nganggo gedhang Kethip. Gedhang hang wis tuwek taping rada ngungkal kelire kuning apik mencirak sing kari barak. Dikemuli adonan hang kelir ijo, diirisi terus temata ring jembung katon ayu. Makene sing kari mongkleng-mongkleng, lan nggampangaken nyendhoke. Mariku terus disiram jenang utawa kopyor, ditutupi es kesrik, disiram setrup lan kental manis. Disawang katon alus ring mata. 

Kadhung tepak liwat Gentengan, aja lali mampir. Paran maning kadhung bangete tengah raina, bedhug-bedhug panas kemelethak. Nyendhok sak jembung Es Pisang Ijo bisa seger lan wareg ukurane wis!

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Dokumen Pribadi

Editor: Hani Z. Noor