Hikayat Sangang Taun Kampoeng Batara

Antariksawan Jusuf (dipublikasikan pada Rabu, 30 Oktober 2024 07:31 WIB)
- Opini

Hikayat Sangang Taun Kampoeng Batara

Tepak kang sepisanan isun sanja nang Kampoeng Batara wolung taun kepungkur, Papring magih katon desa ring pinggir seru, adoh ambi pemerintahan. Dudu papane hang adoh taping sasate hing tau disanjani pegawe pemerintahan. Parek papane taping adoh ring atine.
   Isun kesasar nang alas merga durung ana papan aran hang nduduhi dalan iki arep nong endi. Dalan hang nuju Kampoeng Batara (Baca Taman Rimba) magih lemah lan rejeng. Metu teka kono isun magih perlu diateraken sampek kecaruk lurung aspal nuju nang Kalipuro. Isun mbatin, dhuh desa iki kari sekaken. Parek ambi Gombeng tanggane hang makmur merga kopi lan wedhus ettawa. Gombeng lebih kesuwur kerep disebut-sebut ring medhiya. Rungu aran Papring bain serta isun kecaruk pendhirine Kampoeng Batara, Widie Nurmahmudy.
   Serta dina Minggu 28 Oktober sore isun nekani perayaan sangang taun Kampoeng Batara, hang diwani judhul Hikayat Bambu Papring, bareng ambi kang Hasan Basri ketua Dewan Kesenian Blambangan lan budayawan Pak Aekanu, Papring wis dadi papan hang kerasa parek temenan. Saiki duwe rong panggonan aula, siji umah tikel dibangun teka dana CSR PLN lan sijine bangunan teka jajang dibangun teka Pertamina.
   Tepak perayaan iku, Papring dalane wis aspalan, ana hang papingan. Papan nama hang nduduhaken lan nggampangaken dhayoh-dhayoh hang sanja merana wis cemepak. Dhayoh hang teka rainane kelebu PLT Bupati Pak Sugirah lan Kapolres Banyuwangi, Camat Kalipuro. Saiki Papring ditekani kira-kira 2000-3000 wong setaune, jare Widie. Ana lare KKN, milu pelatian, turis, youtuber lan liyane.
   Bengi iku Papring wis kaya kutha. Genjote wera, lampu panggung maneka werna, wong dodolan, dibagi loro hang njero pager binaane Kampoeng Batara. Seliyane dodol kerajinan jajang, ya ana batik Papring lan kopi Papring. Panjak gendhing tradhisional lare Papring. Malah kabeh produksi multimediane wis ditangani lalare enom Papring dhewek. Hang ring njaba pager wong hang milu golet rejeki dina iku. Ana nawi wong 500-700 hang ndeleng iwuhe Kampoeng Batara.
  Bintang-bintang hang teka kelebu penyanyi Catur Arum lan kelompok ngewer Pelangi (Ali Kentus, Penyet, Gopel, Plecer), penari topeng teka Malang hang tepak ngewani Pelatihan nggawe topeng teka jajang milu nyumbang tari topeng. Durung maning ana peragaan busana hang digawe teka jajang lan godhong-godhong hang dikreasi ambi wong Papring lan desa sebelah yaiku Sumbernanas. Kreasi iku dienggo lan digawa ring dhuwur genjot ambi emak-emak Papring.
   Uga ana kelompok tari teka Institut Seni Indonesia Yogyakarta (ISI) hang nggelar judhul tari Umbang Imbang Saing Yogyakarta. Iki hang nggawe dhadhanisun seru mongkoge lan iluh emeh temetes.
   Salah siji penarine teka ISI iku arane Erpan Effendi. Isun kenal arane lare iki polae tau milu Lomba Nulis Cerita Cendhek hang dianakaken Sengker Kuwung Belambangan saben taun.
   Erpan iki lare Papring binaane Kampoeng Batara hang kawitan bisa kuliyah ring njaba Banyuwangi. Sedurunge, lare Paring ana pisan hang kuliyah taping ring kutha Banyuwangi. Buru Erpan iki hang kuliyahe adoh metu kutha. Hebat Kampoeng Batara wis ngewani dalan pendidikan tinggi kanggo lare Papring, hang sangang taun kepungkur diimpi bain using.
   Hing luput kadhung Kang Hasan Basri nitip wekas nyang Widie kongkon ndhampingi lalare nom-noman nyiyapaken perkembangan mentale supaya bisa dadi tuladha kampung liya. Papring  saiki ana batik, sekolah, kelompok musik teradhisional merga jejaring lan kekancan hang akeh.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.