Ikawangi lan Politik Praktis

Antariksawan Jusuf (dipublikasikan pada Senin, 25 November 2024 08:48 WIB)
- Opini

Ikawangi lan Politik Praktis

Dina Rebo engkisuk arep digelar pemilihan kepala daerah sasate sak Indonesia bareng-bareng.
   Ring pirangane wilayah ana wong diaspora Banyuwangi hang merga uripe wis nong wilayah iku, milu dadi salah siji calon.
   Aju kelendi sikape Ikatan Keluarga Banyuwangi (Ikawangi)? Milu ndhukung tah sing?
   Sakat pemilu terbuka dianakaken sakuwise Reformasi politik 1998 kelawan mudhune presiden hang wis mimpin Indonesia suwine 32 taun, Ikawangi kawitane rada mangmang.
   Ikawangi Pusat ring Jakarta tau milu nyokong calon bupati teka anggotane hang kepingin milu mimpin Banyuwangi. Saiki wong-wonge kabeh wis dadi ruwahe kabeh: Pak Busairi Abdullah, Pak Muljono lan Pak Ikhwan Asrin. Wong telu iki nduwe kerenteg arep milu ring pemilihan bupati Banyuwangi, wis deklarasi, masiya ring mburi-mburi wurung nerusaken lakune. Paling using, Ikawangi bengen tau ngumumaken gok wong telu anggotane iki kepingin milu kontestasi dadi bupati.
   Bupati-bupati Banyuwangi hang wis kepilih sakuwise Reformasi setemene ya wong diaspora Banyuwangi, embuh ana hubungan langsung tah sing ambi Ikawangi. Pak Samsul Hadi megawe ring Jakarta, Bu Ratna Ani Lestari urip ring Bali lan Pak Abdullah Azwar Anas (tau dadi penasihat Ikawangi Pusat).
   Ring jaman politik saiki, ana pirangane wong diaspora Banyuwangi hang milu pilkada.
   Pasangan Rizky Aditya Putra SE, MM lan Abdul Hamid maju minangka calon bupati lan wakil bupati kabupaten Lamandau.
Abdul Hamid iki wong asal Pakis.
   Hang nomer loro ana Dr. Johny Kamuru SH, MSi lan H. Sutejo SPd calon bupati lan wakil bupati kabupaten Sorong. Abah Tejo celukane Sutejo asale teka Bomo, Rogojampi.
   Ana pisan Dr. Atang Trisnanto lan Annida Allivia, calon walikota lan wakil walikota Bogor. Atang teka wilayah ngingsore Gunung Raung.
   Ikawangi Pusat saiki wis menging penguruse lan anggotanemilu-milu politik praktis. Yaiku miloni kabeh maceme kegiyatan hang bisa dihubungaken ambi pilkada mauka.
   Kadhung isun, kudune tetep bain kudu dipilah, endi hang ulih lan endi hang sing. Hing kabrh kegiyatan iku nggarahi congkrah.
   Hang pilihan bupati Banyuwangi, mula apike Ikawangi hing milu-milu, merga mesthi ada beda pilihan. Lamuna pilihane ring dhaerah liya kaya nang Bogor, Lamandau utawa Sorong, mesthine Ikawangi ngidini nang pengurus lan anggotane kanggo ndhukung calon hang teka Banyuwangi. Iki hang arane seduluran, milu nyokong kiprahe dulur.
   Mula kejaba ana calon loro utawa lebih teka diaspora Banyuwangi kabeh, ana potensi bengkerengan. Hang gedigi iki kadhung milu dhukung-dhukungan nggarai benteng ceweng seduluran.
   Taping kadhung Ikawangi mung dienggo ndhukung calon hang hing ana hubungane ambi Banyuwangi, iki kang kelebu politik praktis. Kadhung dijugeri, mesthi ana politik uang nong kono. Kudu dilawan hang gedigi.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.