Jujugan Wisata Edukasi Konservasi Pondoknongko

Andi Sep Kurniawan (dipublikasikan pada Senin, 20 Januari 2020 07:33 WIB)
- Wisata



“Eh Dhik, wis rungu tah kadhung Desa Pondoknongko saiki wis ana wisatane?”

“Deh Rika iki Kang, kari kudet ika ya. Mula lawas ana, arane wisata konservasi lan edukasi. Arane pesisire Kedung Derus, salah sijine desa hang nduwe pesisir nong kecamatan kabat iki ya mung Pondoknongko liyane mosok nduwe.”

“Berarti Rika wis tau merana, yara? Abete kari paham temenan.”

“Hahahah, ya dhurung Kang. Isun mung rungu-rungu teka kancanisun hang wis tau merana," semaure Rina ambi cengar-cengir sing nduwe isin.

“Alakemas, jare Isun wis tau merana ya.”

Serngenge wis melecir, jak loron, isun ambi Rina mangkat teka umah. Kepingin weruh kaya kelendi wisata hang buru anget-angete wartane. Sak dawane dalan, ijone wit-witan nyegeraken mata. Pelipise mata kaya ana hang nyapu, seger temenan. Teka wetan sawangane Gunung Ijen katon sagah, teka kulon sawangane gunung hang ana nong selat Bali uga katon perkasa. Orage pari nggarai isun bungah. Kari yahut ciptanane Pengeran iki. Kalingana Pondoknongko iki magih sugih sumber alame, mugi ya bain masyarakate bisa njaga iki kabeh. Aja sampe dirusak, sekaken putu-putune mbisuke sing bisa ngerasakaken.

“Kang Imin, tulihen tah kok uwong Pondoknongko iki kalingana pinter nggawe kerajinan teka semat ya, Kang?  

“Eh iya yuh Dhik, acake mandheg sedhela. Sing kathik marek wis, mandheg kene bain ya, masiya ya tetep katon kewela-wela," semaure Kang Imin hang nyetir motore.

“Iya Kang. Sangar ya Kang, kok bisane nggawe kerajinan teka semat ale angel. Eh Kang, semate iku kayane digawe piring, wadahe uwoh-uwohan, lepekan, yuh Kang?

“Iya Dhik, kudu nduwe sipat sabar lan telaten Dhik. Ayo wis lanjut.....” ajake Kang Imin nong Rina nerusaken tujuane.

Sak liyane kerajinan semat, uwite kelapa magih jejeg sak rentetan. Nong pucuke uwit ya katon uwong nderes, cumpune liyane nduwe kerajinan semat Desa Pondoknongko iki ya ngasilaken gula abang. Hing maido, uwong-uwong kadhung wis bingung gula melunge, “Lokata nong Pondoknongko tah, nggoleta sak kintal ya magih ana.” Cumpune mula gudhange gula nong kene iki.

Hing akeh desa kaya gedigi, sak werane desa iki kabeh bisa dinikmati. Sosial-budayane uwonge, pegaweyane, alame hang endah wetan-kulon, elor-kidul sawah, wit-witan ya magih padha sagah. Ijo nguripaken pandhangane mata. Uwong-uwong hang seliweran teko elor-kidul ya dijanjeni mandheg, kok bisa? Mergane sak dawane dalan Pondoknongko iki warung-warung pada dhirik rapet, embuh arep ngopi, es, banyu degan, bakso, dhawet, arep mangan paran bain ana. Katonane uwonge ya padha rukun kabeh. Mugi bain yara apik sak lawase, mugi bain uwong pejabat desa bisa ngerawat lan ngedukung hang wis ana iki.

“Eh Dhik sing kerasa ya wis gadhug nong panggonan parkire sepidhah. Tapi kok suwarane ombak pesisir sing kerungu yuh?”

“Alah Rika iki kang, Rika arep ndarat mara ning pesisir? Adoh Kang. Maninga ya hun warahi, kene iki mara ning pesisir nganggo perau. Sawangen tah perau kidul hang gedhi iku, weruh? (Imin mantuk) Lah, ya iku hang awak dhewek enggo nyabrang.”

“Eh kalingana, mara merana nganggo perahu? Yeh, sing weruh Isun. Apik ya Dhik, lawas sing tau nunggang perau dhonge wis gedhi ahire nunggang. Ayo roh wis nunggang!”

Atinisun girang, perau hang ditunggangi katon anteng lan alus suwarane. Rina uga ngenikmati lungguh nong ndhuwure perau. Wisata hang endi maning hang bisa nunggang perau kaya gedigi, murah maning regane. Sak dawane kuwala hang Isun ambi Rina liwati mau, pandhangane katon apik pisan. Wit-wite bakau, padha rukun urip sak jejeran. Ana maning hang kurang, kalingana ya akeh uwong hang mancing pisan tuwek-enom sak anake diajak, ketang panggonane katon iyup paran maning ana warunge. Arep sing nyaman kelendi?

Ahire, bisa njangkah nong pasire Pesisir Kedung Derus hang ana ning Desa Pondoknongko. Buru gaduk bain wis anak hang nyapa, “Selamat Datang di Pantai Kedung Derus” . Iki aran wisatane yaiku wisata konservasi lan edukasi, acake kelendi apike wisata iki. Pesisir iki diakses lan dirumat iki wis sakat taun 2015 ambi golongane nelayan pondoknongko hang arane Pokmaswas Deling Seganten. Ulihe ngerumat mau, ahire pas taun 2018 golongane nelayan wis nyacak mbukak wisatane, rame sedhela mari gedigu radha surut merga bengen durung ana jedhinge paran iku, mung ana track mangrove hang biyasah dienggo ngamet potrek ambi lare enom-enoman. Sak wise iku, nelayan sepakat nutup wisata mulane arep diusahkaken maning ngelengkapi kekurangane. Nah, ning taun 2019 iki pejabat desa ambi enom-enomane (Pokdarwis) iki padha guyub ngerumat lan ngusahakaken pesisir iki makene pantes dadi jujugan wisata. Dadi, ning taun 2019 iki wis ana jedhinge, wis ana panggonan penyune, uga ana wit cemarane. Aju kadhung ditakoni, “Kok bisa diarani wisata konservasi lan edukasi?”. Ya, bisa lah. Iku mau icon wisata iki, paran hang nggawe bedha ambi wisata liyane. Taping ya sing kabeh uwong hang mara merene kudu milu konservasi lan edukasi, ana rong pilihan: wong hang kelenceran iku mau apa mula saking kepingin wisata biyasah, ngeresakaken semilire angin, nikmati alam kaya digu apa kepingin wisata konservasi lan edukasi. Kadhung milih pilihan hang keloro engko wisatawan iku diajari kelendi carane nyangkok wit cemara, diduduhi maceme manuk, diduduhi paran bain manfaat uwohe bogem, lan sakliyane. Dadi pokmaswas lan pokdarwis iki ya sing narget wisatawan kudu gedigi-gedigu, iku mung konsep kabeh pilihane ya ana ning wong hang teka. Gancange cerita ulihe omong-omongane Isun ambi uwong hang ana ning pesisir Kedhung Derus. Kadhung jare hun, konsep wisata iki ya wis apik, ning Banyuwangi arang-arang hang nduwe konsep hang kaya gedigi. Mulane, masyarakate iki sakjane wis kudu padha sadar. Alam wis nguweni, menungsane ya kudu bisa ngerumat.

Dina minggu iki, Rina wadul ning Isun jarene puas bisa ngelencer ning wisata Kedung Derus iki. Ana hang beda hang nggarai atine Rina pernah. Semono uga Isun, Pondoknongko nduweni sekabehane. Wisata gawenan ana, wisata alame ya ana. Eman kadhung sing dirumat lan dijaga bareng-bareng, romote ya dijaga pisan makene sing ngerusak wisata hang ana. Abete Rina ya wis mangkat eksis nong donya maya. Sun tebak pantese ngaplud foto hang sun potrek mauka. Kadhung Isun, minggu ngarep arep ngajak balanisun merene makene bisa ngerasakaken wisata hang beda kaya wisata liyane. Wis murah, apik maning.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf