Kang Lutfi lan Godhong Rega Atusan Juta

Hani Z. Noor (dipublikasikan pada Jumat, 05 Juli 2024 05:48 WIB)
- Tokoh

Enget bengen ana omongan wong tuwek hang disambati anake tepak njaluk ditukokaken barang kang regane larang: "Godhong dienggo picis?" 
   Cumpu, saiki omongan iku kedaden temenan. Kang Lutfi hang tau madeg dadi camat ring pirangane kecamatan kelebu Kecamatan Kota Banyuwangi, aju dadi Sekretaris Dinas/PLT Kepala Dinas Kesbangpol lan saiki ring wayahe mareki pangsiun njabat dadi Sekretaris Inspektorat.
     "Picis kaya hing ana regane kanggone wong hang dhemen kembang," jare Kang Lutfi hang  nong endi-endi panggonan njabat, paceke ngengetaken nyang anak buahe gok picis asile korupsi iku hing nambahi sugih, taping akehan dadi mudorot lan digawa sampek nang aherat.
     Kapanane  ngundang sarapan pimred lan wakil pimred belambangan.com ring kebun Anthurium hang kerep disebut Keboen Jasmine. Kang Lutfi cerita dawa bab kawitane nyemplung ring usaha tanaman hias hususe Anthurium iki.
     Bengen ring taun 1994-2005, Kang Lutfi usaha ternak manuk sampek wis bisa ngirim nyang luar kota. Aju ring taun 2005 tepak dines ring Kecamatan Kota Banyuwangi, ambi Pak Arif Setiawan diajak milu ring pirangane event, salah sijine Banyuwangi Agro Expo. Taun 2005, 2006 lan seteruse saben taun milu ubred ring kegiyatan iki. Sakat iku Kang Lutfi mangkat nyemplung ring donya tanaman hias.
     "Tanaman hias iki mula gentenan usume, hang lagi ngetrend paran Isun mulai dhemen, misale Aglaonema, Adenium, Sansiverra lan liya-liyane, kelebu Puring bengen iku. Kabeh Sun rawati sampek tau dadi budidaya paling apik," gedigu ceritane Pak Lutfi nyang belambangan.com.
     "Trend tanduran utawane tanaman hias iku mula ngalami munggah mudhun regane, sakuwise taun 2013 Isun mulai main Anthurium sampek seperene lan wis ngasilaken silangan hang duwe karakter werna utawa karakter serat godhong hang kuwat."
     Miturut Kang Lutfi, Anthurium iki beda ambi tanaman hias liyane, Anthurium sing gampang mudhun regane asal tetep dijaga karakter godhong asil silangane hang dikawinaken antarane jenis Hookeri, Jenmani, hang abang, hang varigata lan sepiturute.
     "Ngerawati tanduran iki kerasa gampang lan nggawe ayem, merga kadhung ngerawati manuk iku kaya ngerumat bayi, saben dina makani isuk, bedhug, soren, kudu tuku pakane, ngerijigi kurungane lan sepiturute, dadi hing bisa ditinggal menyang njaba kutha, kadhung kembang iki mung perlu disiram, aju telung dina buru disiram maning hing masalah, ngewani pupuk ya hing saben dina."
     Sakat Kang Lutfi njabat ring kecamatan luar kota Banyuwangi, wis hing ngerawati manuk maning lan genti ngerawati tanaman hias. Merga bandha perawatane hing sara kaya manuk lan asile nggawe girang. Sakat iku iyane mulai dhemen nyang  tanaman hias. 
     "Taun 2007 Isun kepilih dadi Ketua Asosiasi Petani Tanaman Hias seperene. Iki mula hobi. Kelawan jabatan hang Sun duweni Isun bisa ngewani fasilitas nyang kanca-kanca kanggo nganakaken pameran-pameran tanaman hias, ring Taman Blambangan, ring Roxy lan panggonan-panggonan hang sekirane bisa ngewani asil apik kanggo petani tanaman hias."
     Tepak Kang Lutfi dines ring Singojuruh sakmarine dines nong Licin, iyane pindhah manggon ring umah dinas ngarepe Rumah Sakit Yasmin, ring kono iyane ndileng ana tanah kosong hang werane sekira 1200 meter, cumpu iku tanah duwene Pemda. Aju iyane ngajokaken nyang Badan Aset kanggo nyewa tanah kosong iku suwene 10 taun. Sakdawane iku iyane mangkat nyilang-nyilangaken jenise Anthurium lan asile ana hang dadi hibrid variasi. Merga tongkole akeh, anakane tambah akeh, iyane mulai mbayar pegawe, ana loro hang mula ahline.
     Jenise Anthurium iku akeh maceme, kelebu Anthurium Kuping Gajah hang maceme uga akeh. Ana Anthurium Jenmani Mangkok, Cobra, King Cobra, Tornado lan liya-liyane. Hookeri uga akeh maceme, saiki njumbul hookeri warna, ana hang abang, ungu, varigata lan sepiturute merga kelir-kelir godhonge cumpu bisa digawe. 
     Bengen, ring pameran taun 2007 tau ana hang kelir pink hang aran Gusti Sintang duwene Pak Mukti tembus regane sampek sak milyar.
     Cumpu saiki kelir iku bisa digawe, abang, ungu, pink lan liyane. Dadi akeh pisan jenis Jenmani, Hookeri lan liyane iku hibrid teka asil hang disilangaken ring kanca-kanca. 
     Hang saiki munggah pamor ring Anthurium iki jenis Obor, rong taun kepungkur sukur disilangaken, saiki cumpu dadi trend, rega bibitane bain hang godhong telu sak juta setengah, godhong 5-6 rega rong juta setengah, ana hang gedhi sempat payu 60 juta. 
     "Melebu ring kalangan pemain Anthurium nasional, Anthurium Obor hang abang bisa nggadug rega ndhuwure 50 juta, iki temenanan sampek hang lis abang aran Super Red Dragon ring panggon hang Isun paceke njuwut ring Karang Anyar iku, nggawa picis 500 juta hing diuwakaken. Dadi regane saiki kira-kira ya sak milyar lebih." Jare Kang Lutfi.
     Pemasaran iku akeh-akehe online, tapi pemain gedhi biyasahe teka, polae kudu ndileng karakter godhonge, hing percaya ambi kamera foto utawa video. Teka Tawangmangu, Karanganyar, Jakarta, Batu, Malang lan kutha-kutha liya padha teka nyang Keboen Jasmine iki. Mula sementara iki ring Indonesia produk Anthurium Obor hang gedhi ya ana ring kebun Yasmin iki. Mula iki wis dadi ikon kanggo Banyuwangi gok Kang Lutfi iki hang bisa nyilangaken Obor Merah.
Kanggo penghobi liyane Kang Lutfi uga nganakaken pembinaan plasma-plasma, ring Kalipuro, Secang, lll.
    Akeh hang setemene dhemen kembang hias tapi hing duwe picis,  aju digawekaken green house, dibandhani sithik aju engko ulih bagiyan prosentase penjualan. 
     Mula ana ring pirangane panggonan, kebun Yasmin iki duwe plasma.
"Paling using kanca-kanca Hun arahaken gok hang saiki paling dadi trend ya Anthurium Obor Merah iki hang regane sampek atusan juta," jelase Kang Lutfi.
     Anthurium iku kelebu paling gampang rawatane, hing kaya kembang liyane, merga iki kembang purba umure ya bisa sampek dawa sing ana watese, merga kadhung ana masalah misale keneng penyakit, bisa dicacah bain gagange, sukur magih ana odode bisa merujuk maning. Rata-rata, wong-wong akeh hang tuku hibrid bibitan, sak juta rongatus, sak juta setengah, polae kadhung wis gedhi regane larang.
   Kadhung Aglaonema setaun kepungkur regane dhuwur, taping merga diserang Thailand kelawan sistem kultur Jaringan hang sekali cacah bisa dadi akeh, pasar ring kene padha anjlok. Kelebu Aroid kaya Janda Bolong hang sabene sampek artis-artis milu ngeramekaken merga regane puluhan sampek atusan juta iku mung rame suwene setaun setengah, mari iku hing ana abane, naming kadhung Anthurium iki saksuwene karaktere bisa dijaga regane bisa tetep dhuwur. 
     Ring Keboen Jasmine iki macem-macem hang disilangaken, Jenmani Mangkok, Hookeri Purple, lan liya-liyane, tapi kabeh disilangaken ambi Obor, pengarepane bisa ngasilaken silangan anyar hang werna-werni kelire misale Obor Purple, Jenmani Obor, utamane hang varigata. Dadi saiki para penghobi nguber moment kelendi carane kabeh silangan jenis mauka bisa wujud godhonge kaya obor. Misale kaya Mangkok disilang ambi Cobra Batik asile arane Jacky Chan, sore ring Pak Eddy Pranoto (ahli kembang teka Karanganyarred) kisaran regane seket juta-an, pokoke kisaran regane wis puluhan juta.
     "Ya kelendi maning.. iki usaha hang awak dhewek dhemen kerana hobi, dadi ana hiburane ring usaha iki. Jare ahli-ahli iku dhung mulih megawe aja langsung turu, dadi kaya gedigi iki.. mulih megawe soren-soren ngerawati tanduran. Kadhung ana penyakite dirijigi, lan sepiturute. Dadi utek hang wis kesel sedinaan ring panggon megawe dihibur kelawan ngerawati tanduran saingga bisa lebih enak istirahate, isuk-isuk uga gedigu, ndileng tanduran maning, ngerawati maning, pikiran dadi seger aju siyap megawe. Iku mula hing rupa picis tapi iku asil kang nduweni mampaat kanggo awak dhewek," ucape Kang Lutfi.
     Mengarepe Kang Lutfi arep nganakaken kegiyatan kaya Home Schooling, dadi sekolah Anthurium digu. Nganakaken pendhampingan nyang ibu-ibu hang aktip ring kegiyatan berkebun, lan sepiturute.
     "Sore wis sosialisasi, polae rata-rata ibu-ibu iki wis duwe kegiyatan Karang Kitri yaiku kegiyatan hang manpaataken pekarangan kanggone berkebun, nandur kacang, lobok, tomat lan liya-liyane hang tujuwane kanggo ngirit picis belanja."
   Sore tepak gesah, Kang Lutfi ngomong nyang ibu-ibu iku, kadhung pekarangan iku dienggo nandur Anthurium hang modhale padha, ngerumate padha, kesele padha, ulih rasa girange padha, engko hing mung ngirit picis belanja pawon tapi bisa dienggo mbangun pawon merga kadhung asile apik regane bisa dhuwur. 
     Miturut Kang Lutfi, iki setemene salah siji terobosan ring bidhang pertanian. Dadi tani iku hing mung pari lan pari, hang nyatane saiki mula pupuke tambah larang lan asile sing sepira, kaya hang dadi sambatane para petani. 
     Kaya dene ring Batu dhaerah Sidomulyo, ring Kampung Bunga Sidomulyo, emeh kabeh warga kampunge nandur tanaman hias, akeh trek-trek teka luar kota hang teka njuwut pesenan kembang nyang Batu.
     "Dadi Isun mikir, apuwa hing nggawe kaya gedigu misale ring Tamansari ngingsore Ijen. Wis tau Hun cobak taping merga hing suwi dinas nong Licin dadi durung katon asile." Ujare Kang Lutfi mungkasi gesah perkara Anthurium.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.