Kol. Inf. Faisal Rizal, Lare Using Madeg Dadi Dandim Balikpapan

Arif Sugiono (dipublikasikan pada Jumat, 09 Juli 2021 19:01 WIB)
- Tokoh



Kolonel Inf. Faisal Rizal lare Using hang sukses madeg dadi Komandan Distrik Militer (Dandim) 0905/Balikpapan minangka salah siji lare Banyuwangi hang nduwe karir apik ring donya kemiliteran. Kang Faisal lair ring Benculuk Banyuwangi lulus teka Akademi Militer taun 1997.

Kanggone wong hang kerep diceluk kelawan aran Faisal iki tugas kemiliteran ring teritorial utawa ring jabatan struktural ibarate wis dadi sega jangan. 

Bengene lulus teka SDN Benculuk taun 1987, Kang Faisal wis wareg mimpin maneka tugas operasional tempur kayata OPS Pemburu Aceh sampai OPS Rahwan Maluku.  Sakliyane iku iyane ya wis milu pirangane pendidikan militer utamane ring ranah intelijen. 

Lahan tepat untuk iklan anda di sini.

Hubungi: skb@belambangan.com atau WA telp 0811843457


Lakine Siska F. Dewi iki nduwe keahlian hang spesial yaiku paseh basa Aceh. Kepinterane basa Aceh iku merga bengen tau ditugasaken ring Aceh. Merga tugase, iyane wis ulih maneka penghargaan, kayata lencana Karya Bhakti, Darma Nusa, Kesetiaan lan magih akeh maning penghargaan liyane. 

Sak liyane pinter basa dhaerah, kang Faisal iki uga jago basa Inggris merga iyane uga tau ngelakoni tugas ring Pilipina tepak ana latihan bareng kelawan aran: LATMA DOLPHIN ring taun 2013.

Wong hang dhemen ngewani tausiah iki nduweni motto Urip iki kanggo ngewani lan dakwah, laku apik iku artine ngubar ilmu agama ring endi bain iyane ulih tugas. "Sampekaken nong wong akeh masiya mung sak ayat," gedigu jare kang Faisal. 

Sorene maning, rombongan Ikatan Keluarga Banyuwangi (Ikawangi) Balikpapan, dipimpin ketuane Kang Suyitno lan rombongan yaiku Wakil Ketua I Supriyanto, Wakil Ketua II Budi Sakti Purnomo, Sekretaris Arif Sugiono lan Humas Lilik Sismiati ngoberaken silaturahim nang kang Faisal minangka kenalan ambi pejabat anyar.

“Kene iki perlu kenal nyang pejabat anyar makene iyane weruh gok nong kene ana Ikawangi lan perlu silaturahim," jare kang Suyitno.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Wawancara

Editor: Hani Z. Noor