Kopi Tepi: Destinasi Wisata Murah Meriah
Antariksawan Jusuf (dipublikasikan pada Kamis, 27 November 2025 07:06 WIB)
- Wisata
Kopi Tepi, Destinasi Wisata Murah Meriah
Kawitan kerana seringe memengan bareng sak kancaan ambi ndeleng sepur liwat ring Lingkungan Beran Kelurahan Kabalenan, Faisal lan Tito pungkasane duwe ide mbukak usaha adol wedang kopi ring ndhuwur sepidhah udud. Kerana kerja kerase lare keloron, pungkasane Beran hang ana ring pinggiran kutha, bisa dadi destinasi wisata hang murah. Kabeh hang teka merana, lungguh ring puthuk hang ana ring pinggiran ril sepur. Ambi ndeleng sepur hang liwat ring ngisor, iyane kabeh bisa nikmati dagangane Faisal lan Tito.
Kadhung kepingin ndeleng sepur liwat ring Beran, arah-arahe cukup gampil. Teka Indomaret Pakis ngulon ngelewati Ponpes Cengho. Terusa bain ngulon sampek dalan paping. Sakuwise ngeliwati ril sepur, langsunga beluk nengen miloni dalan paping sampek ketemu dalan lemah. Ring kana engko katon wong-wong dhirik lungguh ring suket ambi ndeleng sepur liwat. Mesthi bain katon Faisal lan Tito ngelayani pesenan ring ndhuwure sepidhah udud, hang dikenal ambi aran Kopi Tepi. Warung kopi di tepi rel kereta api.
Dagangane lare loro iku macem-macem ombenan, teka hang panas sampek hang adhem. Kaya kopi cemeng, kopi susu, es Milo, es Nutrisari, es Capucino lan liya-liyane. Sakliyane iku, Faisal uga nyedhiyakaken mie instan cup. Teka wong-wong kampung hang parek, ana uga titipan jajanan, kaya sate penthol, sate pitik, rujak manis. “Kadhung titipan iki hing mesthi ana saben dina. Paran jare hang titip,” jare Faisal ambi ngudheg wedang kopi.
Sebenere Faisal iki wis duwe penggaweyan tetep, yaiku guru ring salah sijine SLB ring Banyuwangi. Tito uga wis megawe ring salah sijine Home Stay hang ana ring Licin. “Usaha iki wis Sun lakoni rong taun. Kawitan kanggo ngisi waktu longgar sakuwise megawe. Kerana Tito megawene sip-sipan, dadi sing bisa saben dina milu adol ring Kopi Tepi,” jare Faisal hang saiki wis diuweni momongan siji.
Faisal nambahaken, kawitan dagangan wedang kopine mung ditekani ambi kancan-kancane dhewek hang mula kerep ndeleng sepur. “Naming kerana teka omongane lare-lare, pungkasane akeh lare nom-noman hang teka merene. Sangsaya suwi sangsaya rame kaya saiki,” jare Faisal.
Kopi Tepi iku dibukak sakat soren, jam telu sore. Tutupe kira-kira arepe Magerib. Sak suwine iku, pengunjung disuguhi liwate sepur Probowangi, Sritanjung lan Belambangan Ekspres.
Berkat usaha promo hang ajeg dilakoni liwat media sosial, pungkasane Kopi Tepi dikenal ambi wong Banyuwangi. Saiki dudu mung lare nom-noman hang teka merana. Emak-emak, apak-apak, adon-adon, anang-anang, uga akeh hang kepingin ndeleng sepur ambi nyeruput wedang kopi.
Cumpu ramene pengunjung Kopi Tepi, dadi incerane pedagang jajanan liyane. Siji-siji pedagang milu adol ring lokasi Kopi Tepi. Ana bakso gerobag hang biyasah ider keliling, penthol cilok, gohyong, maklor lan liya-liyane.
Salah sijine rombongan emak-emak teka Kelurahan Tukangkayu ngaku, kawitan iyane sing ngerti dhung ana destinase wisata hang murah. Iyane ngerti teka ceritane uwong-uwong. Kerana penasaran, pungkasane rombongan emak-emak iku sepakat bareng-bareng budhal ndeleng sepur ring Beran.
"Rombongan iki niyat teka ambi nggawa sega bungkus, jajanan lan liya-liyane. Dadi ceritane mung arep pindhah madhang. Mung ombenane tetep arep tuku ring Kopi Tepi. Sekaken kadhung sing ditukoni. Temakaken cukup nyenengaken, masiya kudu nggelar kelasa ring suket-suketan. Akehe pengunjung nggarahi tambah nyenengaken. Paran maning tepak sepur liwat, masinise milu ngawe-ngawe ring pengunjung,” jare Mak Pur hang teka Tukangkayu.
Sakuwise rong taun melaku, usaha Kopi Tepi sangsaya rame pengunjung. Hang kawitan mung adol ring ndhuwure sepedhah udud ambi kothak cilik, saiki wis nganggo meja. “Muga-muga bain mbisuke bisa tambah rame lan tambah gedhe. Bisa dadi cafe ring kene,” karepe Faisal teges. (Urip Limartono Aris)
Poto: Faisal tepak ngelayani langganane
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.