Kuliner: Terong Goreng Lobok Uyah

Hani Z. Noor (dipublikasikan pada Sabtu, 23 Oktober 2021 11:46 WIB)
- Kuliner



Sakliyane dikulub, digoreng, digerengseng, disambel, diolah jangan lodheh, dikapak kirane terong iki makene sing nguwelehi?

Dina iki nak nyobak ngedum olahan terong liyane, nawitah cocog nyang rika kabeh.

Bahan hang dibutuhaken:
3 iji terong gedhi utawa 10 iji terong welut, dirijigi aju diirisi sakdhemene
Rong gelas cilik gelepung terigu
Endhog siji bain
25 iji lobok litik dirajang
5 siyung bawang putih
2 lonjor bawang pre utawa 10 eler bawang godhong
Setengah sendhok teh merica bubukan
Lenga secukupe
Uyah secukupe

Carane:
Gelepung, merica bubukan, endhog, uyah diuled dadi siji, tambahana banyu sampek dadi adonan hang sing patiya encer taping ya sing kenthel seru.

Terong hang wis rijig diirisi sakdhemene dicelupaken nyang adonan mauka aju digoreng sampek adonan gelepunge mateng, soklat taping sing garing seru.

Kadhung wis digoreng kabeh teronge, aju gorengen bawang putih hang wis digejah lan dicacah kasar ambi lobok hang dirajang kasar sampek alum rada rada garing taping hing mateng seru.
Kadhung wis mateng, aju sunteken lenga ring wajan mauka sampek kari sithik bain sakcukupe dienggo nggerengseng.

Kabeh bahan hang wis digoreng mauka lebokaken nyang wajan diuled dadi siji, sedhilut bain sampek arum, aju tambahana rajangan bawang pre utawa bawang godhong, geni dipateni, dadi bawang pre utawa bawang godhong mauka magih ijo.

Aju kari diuwur-wuri uyah secukupe, diurap sampek rata.

Gampil yara?

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf