Layar Kumendhung ring Festival Tunas Bahasa Ibu 2024

Antariksawan Jusuf (dipublikasikan pada Jumat, 08 November 2024 06:38 WIB)
- Opini

Tepak gendhing kuna Layar Kumendhung digandhangaken ambi Ahmad Rivandi Oktavian ring ballroom Hotel Santika Surabaya,  jithok sakkal kemesar. Jare Pak Erpandi Kasi Peningkatan Mutu dan PTK SD Diknas, rasane kaya ring Kemiren.
   Suwarane Rivan kadhung hing ndeleng larene, kaya suwara gandrung wadon hang wis dhewasa lan cengkoke seru kerasa Usinge. Rivan murid SDN 1 Lemahbangdewo  iku buru bain menang ring Lomba Nembang Festival Literasi Using tanggal 2 Nopember sore. Ndeleng tampilane Rivan, Pak Erpandi seru girange. Taun sore, mata lombane mung telu: Memengan Sandhiwara, Ndongeng lan Pidhato. Hing ana Nembang.
   Ketepakan Balai Bahasa Jawa Timur (BBJT) sakat 2023 nganakaken Revitalisasi Bahasa Daerah kanggone Jawa Timur yaiku basa Medura lan basa Using. Revitalisasi iki dianakaken ring pitung mata keterampilan basa yaiku 1. Ndongeng 2. Pidhato 3. Ngewer 4. Nulis Cerita Cendhek 5. Nulis Puisi 6. Maca Tulis Aksara 7. Nembang.
   Proses hang diliwati ring Revitalisasi iku kelebu ngajari guru-guru master, aju guru-guru iku nularaken nang muride. Ring pucite acara dianakaken Lomba kanggo lalare lan hang menang diejak milu selebrasi Festival Tunas Bahasa Ibu (FTBI) ring Surabaya lan ring Jakarta kanggo tingkat nasional dipiloni kabeh propinsi.
   Dene taun sore, teka penemune Profesor Imam Suyitno, wong Banyuwangi hang dadi dhosen ring UM lan ngajari nggawe modul kanggo mulang guru-guru (hang sakteruse ditularaken nang murid-muride), keterampilan Nembang diganti Nggendhing. Lagune hing perlu hang kuna-kuna taping hang wis populer.
   Taun iki Ketua Panitiya FTBI BBJT Dr. Oktavia Vidiyanti ngewani wekas Lomba Nembange kudu ana gendhing kunane. Pungkasane ring pilihan gendhinge ana: Layar Kumendhung, Sekar Jenang, Kembang Pepe sakliyane gendhing populer kayata Wayah Surup lan Angen-Angene Wong Tuwek. Layar Kumendhung kelebu gendhing kuna hang nduweni petang bait yaiku Layar Kumendhung, Lilira Gileh, Lilira Kantun lan  Sekar Jenang.
   Ana guru rada jengah, endane lare SD bisa nggawa gendhing-gendhing kuna iku? Salah sijine Pak Suko, guru SD Tampo hang uga ketua Sanggar Seni Gandrung Arum uga ketua Patih Senawangi (Paguyuban Pelatih Seni dan Tari Banyuwangi) lan suteradara Gandrung Sewu.
   Cumpu, Festival Literasi bisa ngasilaken "sindhen" kaya Rivan. "Iki salah siji asile Revitalisasi lan Literasi Using," jare Pak Erpandi. Taun ngarep wis direncanakaken ana pelatihan Macaan Lontar Yusup kanggo guru-guru, tambah pejabat hang milu dadi panjak ngancani grup Larasati pimpinan Kang Juwono, tepak Selebrasi FTBI sore.
   Mengarepe, muga-muga lair maning Rivan-Rivan liyane nduduhaken gok iwuh Revitalisasi lan Literasi iki ana asile. Ana lalare enom hang bisa nerusaken nggandhang gendhing kuna, hing mung koplo. Lan tujuwan ndadekaken lalare enom dhemen nang basa tinggalane embah buyut hang saya suwi saya keseren basa liyane.
 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.