Ngimpi RT Mandiri

Antariksawan Jusuf (dipublikasikan pada Kamis, 22 Agustus 2024 08:31 WIB)
- Opini

Mula enak RT hang mandiri, maksude hang duwe usaha bisa ngasilaken picis. Kebutuhan kas RT saben dinane bisa ditambeli.
   Kaya RT 01/RW 05 Kelurahan Klathak. Merga ketua RTne, Pak Astro, nduwe keahliyan bab kembang lan wit-witan, iyane ngejak wargane nandur kembang lan wit-witan liyane kayata terong, lobok, ranti ring pot. Lan ring tanah kosong hang kelebu fasum (fasilitas umum) lan fasos (fasilitas sosial) iyane nandur bonsai. Ring ngarep dalanan hang nong RTne ditanduri kembang kertas (bugenvil) hang ngetokaken kembang sak teruse. Kadhung tepak rendheng rada sudha, naming tepak ketiga kembange saya ndadi.
   Hang nggawe ngilur pengurus RT lan warga liyane yaiku wit-witan bonsaine hang regane bisa sampek puluhan juta. Jare Pak Astro, kanggone wong awam lan hang hing tau weruh ya rasane mohal. Kelawan untung gedhi gedigi kebutuhan RT umpamane ngelola dheket, mbayar tenaga keamanan, lan kebutuhan liyane bisa ditambel.
   Ketua RT hang bisa nggawe bonsai yara hing akeh? Seliyane bonsai, potensi hang bisa didadekaken picis, setemene wit-witan hiyas utawa tanduran pethetan. Endi maning Banyuwangi iki lemahe subur, banyu ana sak dawane taun. Kadhung hing percaya, takona nyang Pak Moch. Lutfi hang tau dadi camat, PLT Kesbangpol lan saiki dadi Sekretaris Inspektorat.
   "Kanggone wong hang ubred ring "tanaman hias", picis kaya hing ana regane," jare Pak Luthfi. Iyane nggawe kebonan tanduran Anthurium ring parek umahe kanggo ngerawati, nyilang-ngembangaken wit-wit cilik hang merujuk pirang godhong bain wis ditawa uwong. Kembang hang langka, regane bisa sampek atusan juta.
   Kanggo RT-RT ring Banyuwangi hang duwe tanah wera, bisa sinau ring kono kanggo nggawe kegiyatan wargane, nggawe girang atine wargane, nggawe endah lingkungan RTne lan hing cukup sampek semono, uga nguripi kas kanggo kebutuhan RT.
   Paran maning, ngerawati kembang iki hing merloaken tanah hang wera. Saben umah sasate ana tanah hang bisa dienggo ndeleh pot.
    Hing paran-paran wargane nduwe kedhokan kanggo nandur pari lan liyane, naming dhung bisa milu-milu tandur wit-witan hang bisa dadi picis, bisa nyukupi kas RT yara saya enak?

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.