Nyageraken Karya Tulis Alumni Kemah Cerpen

Antariksawan Jusuf (dipublikasikan pada Kamis, 28 November 2024 07:06 WIB)
- Opini

Alumni Kemah Cerpen hang dianakaken Balai Bahasa Jawa Timur (BBJT) dicageraken bisa nggawe karya tulis hang bisa dadi bahan wacan kanggo lalare Banyuwangi sinau basa Using.
   BBJT wis ping pindho nggelar Kemah Cerpen, hang kawitan ulan Oktober 2024 kanggo lalare hang menang ring Festival Tunas Bahasa Ibu (FTBI) taun 2023 lan Nopember 2024 kanggo hang milu FTBI 2024. Ring Banyuwangi lalare iki wis ngeliwati saringan ring Festival Literasi Using hang dianakaken Dinas Pendidikan.
   Kepala BBJT Dr. Umi Kulsum M.Hum njaluk supaya para alumni Kemah Cerpen bisa  nulis sak judhul saben ulane. Iyane uga semaya arep nerbitaken karya lalare hang milu kemah.
   Ring Kemah Cerpen hang kawitan lare Banyuwangi hang milu yaiku Mochamad Khoirul Anam (SDN 3 Sraten), Khansa Ramadani Kusuma (SDN 1 Kabat), Kalea Nadhira Fiorenza (SDN Kepatihan), Aqira Fayyola Nadifa (SDN 2 Karangsari), Rizkia Talita Zahra (SDN Olehsari), Gadis Sifatus Soleha (SMPN 2 Srono), Putri Hidayatul Meicha (SMPN 3 Rogojampi), Frisca Dwi Maulida (SMPN 1 Kabat), Jazilah Iga Palsa (SMPN 2 Cluring), Nadhiva Rahmadania Putri (SMPN 2 Banyuwangi).
   Dene Kemah Cerpen hang kepindho dipiloni Mafrida Aulia Zahra (SMPN 5 Banyuwangi),  Elvira Adelia Zahra (SMPN 2 Srono), Ferlin Anisah Turrohmah (SMPN 1 Singojuruh), Rahma Sekar Ayuningtyaz (SMPN 4 Banyuwangi), Qonita Ruby Humayra (SDN 1 Dadapan), Marisa Safa Azahra (SDN 1 Jambesari), Jesika Maulidyah (SDN 3 Tamansuruh).
   Kadhung bener penjalukane Bu Umi bisa dilakoni, ana 17 lare alumni hang nulis sak judhul cerita cendhek saben ulane, bakale ana 204 judhul karya saben taune. Aju marek diedhit lan dicetak, utawa didadekaken e-book, bisa dadi materi hang nyugihi donya literasi Using. Karya lalare dienggo wacanan lalare.
   Salah siji hang nggarahi abote pengajaran basa Using njangkah iku merga hing ana materi wacanan ring njaba kelas.
   Sedurunge, isun ya wis nduwe penemu hang lebih gampang. Ring Banyuwangi ana 800 lebih SD, 100 lebih SMP. Kadhung diwajibaken saben sekolah ngirim karya muride sak judhul bain sak sekolahan, bisa ana lebih 1000 karya. Nawi cukup dienggo wacanan lalare. Teka lalare dienggo lalare.
   Endi bain hang dilakoni, muga-muga programe iki melaku lan bisa nguwataken literasi basa Using mengarepe.

   

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.