Nyulap Cengkaruk dadi Sekehe Panganan lan Gerimikan

Moch Anil Syidqi (dipublikasikan pada Sabtu, 29 April 2023 09:29 WIB)
- Kuliner

Kanggo wong Banyuwangi, masiya kelase sega mambu ya bakale ana gunane. Sega wadhang iki dipepe garing sampek dadi cengkaruk aju bisa diolah dadi maneka macem panganan lan gerimikan. 

Balik maning nyang cengkaruk. Sega garing iki ring tangane wong Banyuwangi bisa disulap dadi macem-macem. Kadhang kala dipakakaken bebek. Nora arang uga diolah dadi gerimikan. Kaya tah urab cengkaruk, sato lan cempani. 

Bahan utama hang dibutuhaken yaiku cengkaruk lan cikilan. Kadhung olah urab cengkaruk, cengkaruke diedang, diurab ambi parudan kelapa lan uyah. Aju disambelaken ucek, sambel mentakan. Byek, gurih ika pokoke.

Sedheng sato lan cempani beda maning. Cengkaruke mau nora diedang taping diselep utawa dibebek ya keneng. Bahan hang dienggo, antarane sato lan cempani bisa diucap 90% meh padha. 

Bedane, sato sing nganggo parudan kelapa taping kathik gula pasir. Kadhung cempani malah sing kathik gula pasir taping nganggo parudan kelapa. Liyane maning, sato anjrahe dicithak. Taping kadhung cempani sing perlu dicithak. Ucap liyane, sato iku perlu cithakan. Kadhung cempani using.

Cara olahe ya meh padha. Kadhung cempani, kawitan cepakena cengkaruk hang wis diselep (rupa gelepung cengkaruk), cikilan, gula abang lan uyah. Hang kepindho, cikilane iku mau diparud sulung. Aja lali wadhahe dhewekena. 

Sakwise iku, gelepung cengkaruk, parudan kelapa, irisan gula abang lan uyah sak majade iku diurab, diuled ambi rada diwejek-wejek sampek kecampur rata. Pungkase ya dadi panganan cempani wis, lur. Gampang, yara?

Sakwetara, kadhung olah sato, gelepung cengkaruk lan gula abange magih tetep diurab, diuled ambi rada diwejek. Hang mbedakaken kelawan cempani, mariku urabane mau dikuntek nyang cithakan. 

Naming sedurunge iku, dhasarane cithakane kudu diuwur-uwuri gula pasir. Gunane dienggo kembangane, makene wujude saya apik lan menarik. Gedigu thok iku wis, lur. Gampil! 

Isun mau, yara, wis ngomong cempani iku sing kathik dicithak. Nawi rika kabeh ana hang takon: aju cara mangane kelendi? Sakweruhisun, dikepel-kepel ya keneng. Utawa, disendhok uga keneng. Taping paling wenak, miturut anang lan emak, ya dikepel iku wis. Merga lebih lega. Kaya madhang, jarene.

Kadhung sato iku jajan hang diolah husus lebaran, cempani bisa diolah sedina-dina. Pokoke gelem olah, ya olah. Naming saiki wis arang hang olah sato lan cempani. Aperuwa lebaran kesuk delengen nyang umahe wong-wong, ana pirang umah hang nyuguhaken sato. Apatah malah umah rika dhewek hang nyawisi?

Semono uga urab cengkaruk. Kayane saiki ya wis arang hang olah. Serehne bengen wong olah urab cengkaruk iku kerana ngirit beras. Dadi sega sore sing dibuwang taping dipepe. Aju diedang maning lan diurab.

Taping kadhung saiki, kasarane, meh rata-rata sing kurang-kurang beras. Kadhung tepak sing duwe picis, ya bakale utang sulung ring toko. Uga wis arang wong mepe sega wadhang polae nong magic jar segane hing tau mambu.

Mula sing mungkir Banyuwangi iku gudhange jajan lan panganan. Wong Banyuwangi ya pinter nggawe kreasi hang pejaji kelawan bahan-bahan hang ana. Serehne iku mangkane wakeh jajan lan panganan unik lan menarik has Banyuwangi. Kadhung ring desanrika ana olah-olahan menarik paran, lur?

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.