Oktavia: Lare Banyuwangi ring Mburine Revitalisasi Basa Using
Antariksawan Jusuf (dipublikasikan pada Jumat, 14 Juni 2024 08:34 WIB)
- Tokoh
Tepak iwuh Revitalisasi Bahasa Daerah taun sore, Balai Bahasa Jawa Timur (BBJT), ulih biji apik teka Pusat yaiku 93. Seliyane Kepala BBJT Bu Dr. Umi Kulsum, ana ketua proyeke hang dadi kunci ring suksese acara iku. Cumpu dudu wong adoh, tangga dhewek yaiku Mbok Dr. Made Oktavia Vidiyanti, hang kerep diceluk Mbok Okta.
Sakat lair lan sekolahe ring Banyuwangi, melebu SD Brawijaya lan lulus taun 1989, SMPN 1 lan SMAN 2 (saiki SMA 1 Giri), Mbok Okta buru metu teka Banyuwangi tepak kuliyah sampek nggondhol gelar doktor taun sore.
Iyane megawe ring BBJT saiki wis golongan IVA dadi Analis Kata dan Istilah.
Saiki uga koordinator KKLP Molin Bastra (Kelompok Kepakaran Layanan Profesional Pemodernan dan Pelindungan Bahasa dan Sastra).
Kiprahe mbantu tanah kelairane ring BBJT diangkati sakat iyane dikongkon Kepala BBJT kala semono yaiku Pak Amir Mahmud dadi pemimpin redaksi majalah Lontar Using taun 2008. Seperene majalah hang terbit setaun pindho iku dadi siji-sijine majalah hang magih terbit nganggo basa Using.
"Isun enget tepak ngarani majalahe magih bingung namtoaken merga ana Using, Osing lan Oseng. Taping ana rujukan hang dienggo ring Pak Amir yaiku pemerintah dhaerah. Merga Pemda nyebute Using, Pak Amir warah nang Isun kudu nganggo Using, dudu liyane."
Kekarepane ring basa Using, Okta ngomong iyane percaya tetep lestari merga wong Banyuwangi urip sak njerone adat lan budaya.
"Isun nyekseni dhewek kelendi ubede guru-guru master nyang basane dhewek." Guru master yaiku guru-guru hang kepilih lan dilatih kanggo nyebaraken ilmu teka para maestro nyang murid-muride. Taun iki ana 100 guru master, 60 teka SD lan 40 SMP.
"Uga kelendi Pemda gelem nyokong Revitalisasi Bahasa Daerah lan iwuh hang digelar sedurunge RBD iki wis akeh kayata Literasi Using. Ibarate kene iki kaya nguyahi segara."
Arane mula ana Baline merga bapake wong Bali yaiku I Wayan Suwarya Nirasaputra. Sakat cilike Okta milu wong tuweke hang manggon ring Bajang Ratu aju saiki ring Griya Giri Mulya.
Anake mbok Okta iki mung siji endhil lanang lan saiki wis melebu kuliyah ring Univeristas Brawijaya Malang.
Dene ruwahe ibuke bengen guru SD ring SD Brawijaya, aju pindhah nang SD Kepatihan 3 lan limang taun sakuwise pensiyun ninggal donya.
Sak duluran ana telu. Embok penggarepe
Prof.Dr. I. Darmayanti, kepala OR kesehatan ring BRIN, peneliti utama, profesor ahli virus, lair lan melebu sekolah padha ambi iyane. Okta nomer loro. Aju adhike kemunjilan manggon ring Denpasar.
"Masarakat Banyuwangi gelis anggone paham nang situasi. Tepak nggawe iwuh gedigi, wong-wong iku cepet ngarti dadine programe melaku apik.
Intine ana rasa mongkog nyang masarakat Banyuwangi dibandhingaken masarakat liya. Kene nganakaken kegiyatan digi ring panggonan liya pisan...Masarakat Banyuwangi lebih nduweni semangat lan nduwe kepekaan nang budaya lan basa. Rasa percaya nang awake dhewek seru dhuwure, ditambah sokongan teka Perda lan Pemda, utamane Dinas Pendidikane, hebat." Gedigu ujare.
Masiya gedigu, Banyuwangi kadhang nggawa rasa ngelayung kanggone Mbok Okta.
"Kerana Isun gedhine nong kene, saben ngeliwati bucu-bucu panggonan kadhang nggawa ati ngenes enget cilikanisun bengen tepak magih ana Ibu. Saben nang Banyuwangi rasane kaya mesthi ngirim kembang kuburan, iku hang nggawe kelayung."
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
