Pelari Maraton 88 Taun Teka Banyuwangi
Antariksawan Jusuf (dipublikasikan pada Kamis, 01 Agustus 2024 06:28 WIB)
- Tokoh
Ana wong Banyuwangi hang saben taun nggawe kaju wong-wong ring Tangerang Selatan. Arane Pak Tukimin, umure 88 taun (kelairan 1936), magih jaya lan bisa milu Lomba maraton hang saben taun dianakaken Pemda Tangerang Selatan. Masiya mung miloni hang kelas 5 km, Pak Tukimin, dadi peserta paling tuwek. Tambah taun saya tuwek umure lan saya suwi ana wong hang bisa mecahaken rekore.
Aja dapak wong-wong tuwek hang umur 50 mendhuwur, masiya kanggo wong ngingsore 50, mbelayu maraton iki mung bisa dipiloni wong hang ajeg latihan.
Pak Tukimin iki saben dina latihan mbelayu muter-muter ring kompleks umahe ring Permata Pamulang Tangerang Selatan.
Iyane asal desa Gringsing kecamatan Bangorejo, Banyuwangi. Kemunjilan teka lima sak duluran iki wis pindhah nang Jakarta taun 1960an tepak diajak kakange. Aju iyane megawe ring Angkasa Pura, bandara Soekarno Hatta sampek pangsiyun taun 2000. Rabine buru ninggal donya 40 dina kepungkur, ninggalaken anak pitu, putu pitu lan buyut 5.
"Sedurunge milu Lomba, Isun mesthi latihan pirangane kilo. Dadi istilahe aja sampek maksa awak," jare Pak Tukimin hang ulih puluhan penghargaan lan medali.
Iyane ngaku bisa basa Jawa, Using lan Medura merga sesrawungan ring Banyuwangi.
Ana siji medali hang temepel ring tase, hang digembol merana-merene yaiku medali tepak iyane milu melaku teka Yogyakarta sampek Jakarta, tanggal 19 Desember 1993 - 1 Januari 1994.
"Melakune dalu, merga kadhung raina endi panas lan akeh kendaraan. Gadug Jakarta tanggal 1 lan njujug ring Istora Senayan."
Seliyane dhemen olahraga melayu, iyane uga kelebu pecinta alam. "Isun dhemen munggah gunung lan kerep milu kegiyatan digi," jare Pak Tukimin.
Pak Tukimin kerep nganggo topi hang ditempleki macem-macem emblem pecinta alam.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
