Perang Bangkat (Bagiyan 1 teka 3)

Antariksawan Jusuf (dipublikasikan pada Selasa, 19 November 2024 08:34 WIB)
- Esai

Perang Bangkat (Bagiyan 1 teka 3)

Ditulis ring Satriya Pujangga

Adat teradhisi kawinan  hang ana ring masarakat Suku Using Banyuwangi akeh maceme, kayata: Melayokaken, Ngunggahi, Ngelengser/Dilengser, Perang Bangkat, Kosek Punjen lan liya-liyane. Iku kabeh mau Weluri leluhure masarakat Using Banyuwangi hang sing bisa ditinggalaken gedigu bain. Adat kawinan iku mau sing angger kawinan bisa ngelakoni, taping ana sebab-sebabe.

Perang Bangkat.

Salah sijine adat teradhisi kawinan hang wis anjrah noring masarakat Using Banyuwangi yaiku Perang Bangkat. Apuwa gok diarani Perang Bangkat?

Asal muasale cerita jaman bengen ana lare lanang kemunjilan anake wong tani ndhemeni lare wadon. Lare lanang iku sing wani ngomong nang wong tuweke kerana iyane ngerasa sing duwe paran-paran. Wong tuweke hang weruh anake susah atine aju takon apuwa gok gelibegan susah atine. Aju lare lanang mau ngomong dhung iyane dhemen lare wadon taping wedi polae iyane sing duwe paran-paran.

Kerana wong tuweke wis weruh nang kekarepane anake, aju diejak nggoleti umahe lare wadon hang didhemeni sak perlu arep njaluk/ngelamar lare wadon mau ambi nggawa weragate lamaran (Uba Rampe) diwadhahi ekrak/cingkek. Sarta wis gadug umahe, lare lanang mau dipenging ambi bapake lare wadon sing ulih melebu. Kadhung kepingin melebu kudu bisa nguweni tebusan hang dijaluk ambi bapake lare wadon arupa rajakaya hang sing ana ring umahe.

Bapake lare lanang mau mau nyanggupi tebusan rajakaya hang dijaluk tapi sing ana hang cocog. Diuweni sapi, sing cocog. Diuweni kebo sing cocog. Diuweni wedhus, sing cocog. Diuweni menda, sing cocog. Bapake lare lanang mau aju takon, setemene hang dijaluk rajakaya paran, gok kabeh-kabeh sing cocog. Aju bapake lare wadon ngomong rajakaya hang dijaluk iku rajakaya hang matane wera lan lebih gedhi teka endhase. Cumpu hang dijaluk yaiku untring/dhudhuk.

Dadi perang hang dimaksud ring kene dudu perang hang sakbenere tapi arupa usaha lan perjuwangane lare lanang mau lan keluwargane makene bisa ditampa lamarane. (Cerita teka salah sijine pawang/gawangan Perang Bangkat).

Kaya dene teradhisi kawinan hang kesebut nang ndhuwur mau, Perang Bangkat iku ya ana sebab-sebabe. Sing angger kawinan kudu dianakaken Perang Bangkat taping ana pelanggerane. Perang Bangkat iku teradhisi kawinan antarane penggarep ambi kemunjilan lan undhal-andhil, yaiku :

1.  Penggarep ambi Penggarep;
2.  Penggarep ambi Kemunjilan;
3.  Kemunjilan ambi Kemunjilan;
4.  Penggarep ambi Undhal-andhil;
5.  Kemunjilan ambi Undhal-andhil;
6.  Undhal-andhil ambi Undhal-andhil.

 Teradhisi Perang Bangkat iki tujuwane kanggo mbuwang sangkal ambi tulak balak kanggo penganten loro lan keluwargane. Kadhung weluri Perang Bangkat iki sing dilakoni bakal nemu sara, sara penguripane, sara penggaweyane lan nemu alangan hang bisa nggawe cungkrah umah-umahe. Taping iku kabeh dibalekaken nang keyakinane dhewek-dhewek. Jodho, rejeki lan pati iku kabeh Gusti Alloh hang hang duwe lan hang ngatur.

Upacara adat Perang Bangkat lan ngosek Punjen iki dilakoni ambi gawangan/pawang/dhalang. Hang bisa dadi gawangan iki sapa bain hang paham nang tata carane adat Perang Bangkat. Gawangane Perang Bangkat iku biyasahe dilakokaken ambi wong loro, hang siji ngelakonaken bapake penganten lanang lan hang siji ngelakonaken bapake penganten wadon.

(ana sambungane)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.