Perewangan ring Kesenian Tradhisional (Bagiyan 1 teka 2)

Antariksawan Jusuf (dipublikasikan pada Rabu, 05 Juni 2024 08:37 WIB)
- Opini



Perewangan ring Keseniyan Tradhisional (Bagiyan 1 teka 2)

Ditulis ring Moh. Syaiful

Ngomongaken keseniyan tradhisional Banyuwangi mesthi bain sing bisa diselehaken ambi hang aran perewangan (magic). Perewangan iki hang dikarepaken yaiku wujude kekuwatan liyane kekuwatane menungsa hang ana ring alam liya. Umpamane bain jim, wong alus, lelembut, roh, mbah buyut, danyang lan liyan-liyane hang wis diakoni anane ring alam keseniyan tradhisional Banyuwangi. Kekuwatan  liya hang awujud kaya jim, wong alus, lelembut, roh, mbah buyut, danyang lan liyan-liyane iki dipercaya bisa njangkungi utawane ngerewangi anggone wong-wong hang megiyet ring keseniyan tradhisional.

            Sakliyane dienggo ngrewangi lan dienggo njangkungi ring bab keseniyan, perewangan utawane kekuwatan liya hang teka alam beda mau uga bisa dienggo ngerusak utawane nggawe elek hang ditujokaken nyang keseniyan liya hang dianggep musuh (kompetitor). Kekuwatan liya hang teka alam beda hang dienggo tujuwan elek ring kesenian tradhisional diarani nganggo pirangane istilah: “pesengan”, “sihir”, “rapuh”, “cekek”.

            Mula iku perewangan utawane kekuwatan-kekuwatan liya hang ana iku bisa dienggo kepentingan apik bisa uga kanggo kepentingan ala. Iku kabeh balik maning nyang niyate hang duwe ilmu. Keneng diarani perewangan ana hang apik lan ana hang ala, hang nomer siji iku perewangan ring pengertian positip lan hang nomer loro perewangan ring pengertian negatip. Bengen ring jaman ramen-ramene Angklung Caruk—kira-kira ring tahun 1970-an, sing keneng dilali hang aran Perewangan negatip mesthi dadi cerita hang sing keneng ditinggalaken.

SENI TRADHISIONAL SING BISA ADOH TEKA MAGIC

            Ana hang cerita kadhung mari tanggapan angklung caruk, hang aran kendhang isine sumping gedhang goreng lan panganan liyane. Alihe mbukak hang aran kendhang iki sing gampang merga dipuket ring penjalin hang kukuh lan sing sembarang uwong bisa mbukak liyane tukang kendhang. Iki merga sumping, gedhang goreng lan panganan liya mau  dipeseng liwat dalan gaib (magic).

            Sing kalah medeni maning kadhung “pesengan”, sihir, lan “rapuh” iku ditujokaken nyang pemain kuntulane. Byek hang njuged iku mau bisa mutah ngising, gatelen, uga ana hang tangane ngejengker kaku sing bisa dienggo njuged. Tapi ya untunge penyakit hang aran pesengan, rapuh, utawa sihir mau sing angel tamban-tambanane. Biyasahe digawa nyang uwong hang pinter lan bisa nambani gedigonan, sedhela bain wis aron.

            Sing beda teka keseniyan-keseniyan tradhisional liyane, seni Jaranan lan seni Barong bisa didadekaken wujud nyatane kadhung keseniyan Banyuwangi magih kegolong seni kang nganggo perewangan kekuwatan teka alam beda. Iki bisa dibuktekaken anane kembang, menyan, lan japa utawa jampi-jampi ring pementasane Jaranan lan Barong.

(Ana sambungane)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Moh. Syaiful

Editor: Hani Z. Noor