Sambel Goreng Belungan Gerang
Hani Z. Noor (dipublikasikan pada Sabtu, 02 Oktober 2021 06:47 WIB)
- Kuliner
Banyuwangi hang mula wis kesuwur akeh iwak seger teka segara, sangking akehe, ana pisan hang aju digaringaken kelawan dipepe lan diuyahi dadi gerang.
Gerang maneka maceme iwak lan uga ukurane, sakat teka iwak hang cilik sampek hang gedhi ya ana kabeh.
Iwak gerang hang gedhi kadhangane diedol endhase dhewek lan daginge dhewek.
Aju belunge dikapak? Bisa tah endane diolah makene sing dibuwang?
Nah, dina iki nak nyobak ngedum olahan belungan iwak gerang.
Ya mesthine belunge iwak gerang hang gedhi kaya iwak keleng gedhi, putihan gedhi lan liya-liyane.
Bahan hang dibutuhaken:
1 kg belungan iwak gerang gedhi hang biyasahe magih ana daging-daginge hang temepel ring belung lan erine.
Dhung dhemen bisa ditambahi pete.
Lenga secukupe
Banyu secukupe
Ragine hang digerus:
7 bungkul Bawang (abang)
5 siyung Bawang putih
5 iji lobok teropong utawa lobok jawa
15 iji lobok litik
3 iji ranti utawa tomat
10 iji merica putih
Ragi liyane:
20 iji merica cemeng wungkul
5 lembar godhong jeruk purut
3 lonjor sereh
Gula secukupe
3 sendhok mangan saos tiram
Uyah dhung dirasa kurang asin bain.
Carane olah:
Belungan gerang hang wis rijig digoreng setengah mateng, etusen.
Lenga ring wajan dikurangi sampek secukupe dinggo nggerengseng.
Kawitan cemplungaken laos hang wis digejah, sereh hang digejah sulung, godhong jeruk purut hang disuwek, digerengseng sampek arum.
Aju ragi hang wis digerus mauka sunteken, tambahana merica cemeng hang magih wungkul wijian, aju digerengseng sampek mateng.
Cemplungena belungan iwak gerang mauka, digaluh sampek ragine rata.
Tambahana banyu lan saos tiram, aju digaluh maning ambi wolak-waliken belungan gerange.
Dhung dhemen nganggo pete ya dicemplungaken pisan.
Geningaken sampek banyune asat, nyemek-nyemek lan ragine ngeresep.
Isun pokoke emong nanggung kadhung olahan iki mula windhul lan bisa ngantekaken sega hang ana.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.