(Seminggu Ngomongaken Boom Bengen) Mungsing Arab Pegon

Antariksawan Jusuf (dipublikasikan pada Jumat, 08 Agustus 2025 06:45 WIB)
- Opini

Ater-Ater: Sastrawan hang novele Ontrang-Ontrang Langit Payaman buru dipeleciraken, Kang Ujik, nduwe kenangan dhewek. Mula Boom paribasane dadi sega jangane wong Banyuwangi. Saben wong nduwe pengengetan dhewek-dhewek.

Dina Minggu isuk Boom panggonanisun dodolan gedhang goreng lan es lilin. Bengen ring tengah-tengah segara Belambangan iku ana pelampung. Sekira taun 1976 (isun umur 12 taun) ngelangi ring pelampung iku ambi nyokot kacang unting. Kala semono sing ngarti para undur. Gadug pelampung mangan kacang, entek kacange ngelangi maning balik sampek gadug pesisir Boom.
   Taun iku ana kapal tongkang dienggo ngelayani wong hang teka ring Boom wayah lebaran, keliling teka pesisir Boom muteri pelampung lan balik maning ning pesisir Boom.
   Wong Banyuwangi sakat bengen durung ngerasa lebaran kadhung durung nang Boom. Para penumpang kapal mbayar Rp.10 rupiyah. Isun nalika iku nyelindhut milu nunggang kapal tongkang iku. Sing kathik mbayar.
   Kadhung ana petugas hang tukang nariki karcis, isun sengidan ngedohi tukang karcis iku. Dadi ya setengah kucing-kucingan. Tambah-tambah ana pengumuman, kanggo penumpang hang sing mbayar arep dicemplungaken ring tengah Selat Bali. Isun ya sing kuwatir. Merga wis tau ngelangi teka pesisir Boom sampek nggadug pelampung.
   Bengen iku Segara Belambangan utawa Selat Bali iku sing kari wera kaya saiki Iki. Teka dalan ning pesisir iku ana tumpukan watu rejeng ambi uwit-uwit waru hang keneng dienggo ngiyup. Saben Minggu isuk lan soren mesthi akeh uwong padha kelenceran. Melaku-melaku teka pesisir kidul ngaloraken. Gadug elor ngidul maning.
   Isun tau takon ning uwong-wong hang padha kelenceran. Paran tujuwane melaku-melaku ring pesisir Boom? Semaure liya-liya. Ana hang mung melaku-melaku thok, ana hang mula semayanan ambi kanca, ana hang niyat olahraga, ana uga hang mung sak derma katut kanca. 
   Kadhung ngepasi padhang ulan, akeh uwong teka nggawa kelasa ambi nggawa radhiyo lan panganan. Tunggangan hang hebat nalika iku ya dhongkar.
   Nalika dina lebaran, rasane kurang sempurna kadhung durung milu rombongan nyang Boom Banyuwangi. Sedurunge nggadug Boom Ombak akeh uwong hang padha ngogrok ring pinggirane Boom Meneng. Ana hang antri nunggang perahu hang sak tunggangan mbayar limang rupiyah, ana uga hang ndeleng uwong atraksi main ski banyu hang dieret sekoci.
   Sak suwine ring Boom, ngerungokaken
gendhing "Tak Tetak" saben dina sing koleh-koleh teka sepeker hang digantung ring wit cereme ngarepe gudhang Soponyono. Ketang anane kaset gendhing anyar buru iku thok.
   Hang uga hing bisa lali cerita iwak mungsing melebu pawone warga Mandar, kira-kira taun iku.
   Ring epek-epeke ana tulisan Arab pegon unine Siti Nurjanah. Mungsing iku sak engetisun wis dieret kapal nengah selat Bali. Naming engkisuke balik maning nong pawone warga Mandar iku.   
   Pungkasane mati lan dipendhem ring pulau elore Bank Bumi Daya (sakuwise sasak Cikar panggonan melebu nang Boom-red).
   Ulih pirang dina gedigu, kuburane ambles lan mungsinge sing ana. Hang sun weruhi gedigu.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.