Sithik Akeh Dalan Uripe Ruwahe Sahuni

Antariksawan Jusuf (dipublikasikan pada Rabu, 07 Agustus 2024 08:53 WIB)
- Tokoh

Ruwahe Pak Sahuni, Pensiyunan Dinas Kebudayaan dan Pariwisata Kabupaten Banyuwangi. Penata tari utawa koreograper kelairan Singojuruh iki, wis sing kaiitung ulihe penghargaan teka tingkat kabupaten, propinsi lan nasional. Getih seniman diwarisi teka wong tuweke, tukang kendhang macem-macem keseniyan hang urip ring Singojuruh lan sak ubenge. Tau njabat Kepala Desa Singojuruh, lan merga cintane nong keseniyan bengen kepingin ngedekaken Akademi Keseniyan.
   Taun 2018, tau diwawancarai mbok Okta, gedigi sithik akeh cerita uripe:
   Masalah keseniyan, sawangane bain isun sing kaya bengen ubred lan emuk angger ana pentas keseniyan ring Banyuwangi. Kadhung sing dadi petugas minangka Pegawai Negeri Sipil hang mbidhangi iku, uga akeh pentas karyanisun dhewek. Saiki iki isun rada ngunduri kegiyatan kaya iku, makene dilakoni lare-lare enom. Naming aran pikiran iki sing bisa pedhot nyambung terus nang keseniyan.
   Isun sakat umur sangang taun wis milu keseniyan hang urip ring Singojuruh sak ubenge. Isun lair tanggal 22 Agustus 1945, Bapak aran Asri lan Emak Supiyatun. Bapakisun uga PNS ring Kecamatan Singojuruh sakat taun 1955, taping uga seniman kendhang ring macem-macem keseniyan hang ana ring Banyuwangi. Mangkane, Isun kerep diajak tanggapan keseniyan sakat cilik. Rada gedhe, Isun dadi tukang njuged aju dadi pemain Janger Singojuruh.
   Wayah Isun dadi penari lan pelakon janger mau, hang tukang ngendhang bapakisun dhewek. Gedigu terus, sampek Isun gedhe lan didadekaken tenaga serabutan. Basane saiki magang ring kecamatan Singojuruh, taping kadhung ana tanggapan ya tetap melaku anak ambi bapak.
   Mulai taun 1966 Isun megawe nang Kecamatan Singojuruh, aju taun 1970 Isun ditarik nang Kabupaten. Isun ditarik nang Kabupaten ambi Pak Sungkono mau, merga labuhisun nang keseniyan.       Kanggo nambahi kaweruh nang keseniyan, Isun disekolahaken nang Sekolah Menengah Kerawitan Wilwatikta Surabaya. Lulus aju nerusaken nang Solo, Konservatori Karawitan Indonesia. Terus njuwut Diploma-3 taun 1975. Buru taun 1996 transfer nyang STSI sampek lulus taun 1998.
   Sak uwene milu pendhidhikan mau, Isun ya tetap ngayahi tugas PNS lan nerapaken ilmu teka sekolah seni. Aju nyiptakaken Tari Punjari taun 1985 dadi Juara I Tari Tradisional tingkat Jawa Timur.
   Terus angger ana perlombaan tingkat regional lan nasional, Isun kerep makili Banyuwangi. Taun 1988, Tari Paju Gadrung dari Juara Nasional. Taun 1989 karya Musik Layar Kemendhung uga Juara Nasional. Taun 2014, Isun mulai sithik-sithik mundur, Nguweni kesempatan nang lare-lare enom, kanggo nerusaken paran hang wis Sun labuhi lan kanca-kanca seniman Banyuwangi liyane.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.