Susah Senenge Buruh Tani

Siti Maesaroh, S.S. (dipublikasikan pada Senin, 19 Juli 2021 08:02 WIB)
- Opini



Bengi iki tepak isun nyiyapaken bahan ajar kanggo lalare sekolah sing nyeja rungu emak lan kanca-kancane tandur gesah-gesahan. Ambi ngereken picis dum-duman asile tandur isuk mau emak sambat nyang kancane. Dudu sambat sing ana buruhan, naming kerana kakehan buruhan. Kadhung wis usum tandur gedigi wong kang duwe sawah sulung-sulungan mara ngongkon grupe emak nanduri sawahe. Serang akehe kang ngongkon, reng-rengan dina kang wis ana kelendi carane dipetek makene kabeh kedhokan kecandhak. Kadhang sampek sing sanggup nandangi, kang duwe sawah bangur dikongkon golet wong liya.

Angger mangsane tandur mesthi padha ngelu merga kurange tenaga kang milu tandang. Uwong kang buruh tandur wis padha tuwek, ya akeh kang wis sampek umur, dene kang enom sing ana kang gelem milu dadi buruh tandur. Emak kang umur 52 taun bain kereken kang enom. Setemene wis ana mesin tandur, naming juragan sawah sing pati sir nyang asile mesin. Kadhung nganggo mesin sing bisa diatur suwel (akeh) lan jiwire (sithike) winih kang ditandur. Uga sing bisa diatur kerep-arange kaya karepe kang duwe sawah. Kadhang, akeh winih kang mati merga odode ketekuk. Dadi, mesin tandur hususe ning desa Gintangan sing payu. Kadhung wis akeh buruhan gedigu emak kudu golet uwong teka desa liya makene bisa marekaken buruhan kang sing kecandhak. Padha kaya klub tembung kang ngebon pemain klub liya makene bisa menang.

Lahan tepat untuk iklan anda di sini.

Hubungi: skb@belambangan.com atau WA telp 0811843457


Isun ya priatin nyang buruh tani saiki. Buruh tandur seru garuse, sawetara buruh ngerit sing pati payu. Bengen uwong nggampung nganggo cara digebros, uwohe pari disampataken nyang kayu kang diarani ekrak (jare wong Gintangan rancakan). Serta ana mesin doser/dores sing perlu nyampataken pari, uwohe pari kang wis dierit dilebokaken mesin, aju metu teka mesin gabahe wis rijig. Saiki kang keseron maning sakat ana mesin gedhi kang kesuwur diarani kombin, uwong nggampung sing perlu ngerit paran maning nyampataken nyang ekrak. Pari dierit mesin, metune wis dadi gabah rijig, ringkes sak dami-damine pisan. Uwong kang duwe sawah, paran maning kang wera, bangur milih nggampung nganggo kombin. Marine gelis lan sing perlu ruwed nggolet wong ngerit. Dadi, anane mesin ning bidang pertanian iki ya nggawe seneng kang duwe sawah, taping nggarai susah kang buruh merga sing ana pegaweyan kang keneng dicageraken maning. Iki dadi siji salah siji alasan, lalare enom sing sir megawe nyang sawah. Akeh kang milih dadi buruh bangunan kang lebih rame pegaweyane.

Cathetan:

Ngerit, kang dikethok pari

Ngarit, kang dikethok suket

 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Siti Maesaroh

Editor: Hani Z. Noor