Timun Wungkuk Cagere Imbuh

Antariksawan Jusuf (dipublikasikan pada Selasa, 06 Agustus 2024 07:28 WIB)
- Kolom Bahasa Using

Timun Wungkuk Cagere Imbuh
Ditulis ring Nanang YZ

Kaya basa liyane, ucap-ucap basa Using hing kabeh dienggo dadi arti sakbenere. Ring basa Using ana ucap-ucap hang artine nyeliwah dadi arti anyar kapan wis dienggo ring wangsalan, kiyasan lan paribasan.
   Ana salah siji paribasan hang bisa dadi arti loro, elek lan apik yaiku: timun wungkuk cagere imbuh. Arti sak majade setemene timun hang teka perujukane hing sampurna, hing lurus apik, gedhine pucuk siji ambi sijine hing padha.
   Ring pasar lumrah lan anjrahe barang hang arep diedol utawa ditawakaken nyang calon wong hang tuku iku kulinane kelawan wujud pisik hang apik lan normal, semono uga kaya dene timun hang arep diedol mesthine hang dipilih ya hang gedhi-gedhi kenceng. Hang wujude melungker cingker, wungkuk iku ya mung  dienggo ngimbuhi uwong hang tuku mauka.
   Ring timun wungkuk kadhang ring bonggol hang temancep ring uwite malah mung cilik hang melungker cingker kaya inthil-inthil.
   Timun gedigi iki kadhung diedol hing payu utawa payu taping regane murah, utawa mung didadekaken bonus, imbuhan kadhung ana wong tuku timun liyane hang apik.
   Ana paribasan: timun wungkuk cagere imbuh, hang nduweni arti sewang-sewangan, siji elek, sijine apik.
   Hang elek iki ngibarataken uwong bongol hang mung bisa dikanggokaken enggo dikongkon-kongkon bain. Wong gedigi iki hing duwe inisiatip, mung nganteni perintah buru melaku.
   Ring arti positipe, paribasanan iku uga bisa nduweni maksud umpamane anak hang nganggep wong tuweke iku wong bongol hang sing ngarti paran-paran, tegese ring kene uga nyepelekaken seru nyang wong tuwek.
   Naming masiya jare dianggep sing bisa diempet gawene utawane wis dianggep sing bisa tandang paran-paran taping magih ana lan nduweni sawab ring donga-dongane
   Tuladha ukara jangkepe bisa kaya dene gedigi: Sira aja kari seru-seru kadhung nyingkur lan nilapaken wong tuwek, ambekane kelendi-kelendiya aran wong tuwek iku magih bisa dadi timun wungkuk cagere imbuh. Wong tuwek magih ana mampaate masiya mung sukur dijuwut dongane bain hang bisa diarepaken.
   Masiya kayane wis hing ana gunane, cumpu wong tuwek iku magih bisa nggawe kuwalat utawa ngerejekeni merga dongane.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.