Ucap Silihan Basa Arab ring Basa Using

Antariksawan Jusuf (dipublikasikan pada Kamis, 16 Juli 2020 09:09 WIB)
- Kolom Bahasa Using



Wis hing ngagetaken gok basa Arab dadi salah siji donor ucap-ucap hang akeh disilih ring basa Using. Mergane paran? Sak liyane akeh dienggo ring sak ubenge tata cara ibadah sedina-dina wong Islam, aksara arab disilih ring basa Jawa bengen, arupa basa Arab pegon, hang dienggo nulis ring rontal-rontal hang ana ring Belambangan.

Ucap-ucap iku umpamane:

Hang dikawiti /j/: Jahil (suka memfitnah; berhati buruk), jaitun (zaitun), jakat (zakat), jamak, jaman, jiarah.

Hang dikawiti /p/: paham, palak, palsapah, pana (tidak kekal), pardu, paseh, patwa

Uga ucap liyane kaya maderasah, maklum, rakyat, majelis, makmum, manpaat.  

Teka rontal utawa lontar hang ceritane mula ana unsur Islame kaya Lontar Yusup, Lontar Ahmad, Suluk Sudarsih, Serat Ambiya, sampek teka cerita liya kaya Serat Sritanjung ana versine hang ditulis nganggo aksara Arab pegon.

Tulisan iki mung njuwut ucap-ucap hang ana ring Kamus Bahasa Daerah Using Indonesia hang disusun ruwahe Pak Hasan Ali. Hang nggawe rada buledan, penulisan aksara ring basa Using hang dienggo pelanggeran saiki iki kaya ring Pedoman Umum Ejaan Bahasa Using (cara Menulis dan Membaca Bahasa Using) hang diterbitaken ring Dewan Kesenian Blambangan tahun 2006, hing ana aksara /f/, /q/, /z/, /kh/, /sy/.

Kadhung dititeni, mula rada mbingungi nulis basa Using kanggo ucap-ucap hang disilih teka basa Arab. Polae, basa Using hing duwe aksara /f/, /q/,/v/, /x/, /z/ lan sithik nduweni kekarepan nyilih unsur /kh/, /sy/ pisan.

Ring Petunjuk Penggunaan Kamus, disebutaken gok aksara /q/. /v/, /x/ ring ucap-ucap silihan ditulis kaya aseline: Quran, aqua. Taping ring isi kamuse, Quran mau ditulis dadi Kuran utawa hang cara percakapan umum Koran. Merga lema Q hing ana.

Semono uga aksara /f/ dadi /p/ lan /z/ dadi /j/.

Kayata:

/Fikir, lafal, pasif/ dadi ditulis /pikir, lapal, pasip/.

/zat, zaman, hamzah/ dadi ditulis /jat, jaman, hamjah/.

Jare kamuse mau, magih ana ucap-ucap hang magih bisa nganggo /f/, umpamane:

/fakir, falak, fitri, fakta, fonem/. Taping ucap-ucap iki hing ana ring njero kamus merga hing ana lema /f/.

Ucap-ucap silihan basa Arab seliweran ring basane wong Banyuwangi. Ana hang bener-bener disilih ana hang disilih aju disiluri artine.

Umpamane:

/syariat/ dadi /sereyat/ (Aja kakehan sereyat/Jangan banyak tingkah). Setemene syariat hang dimaksud iku agama Islam (Dharma Rasul, kadhung istilah bengene). Ucap syariat suwi-suwi nyeliwah artine dadi aturan utawa tingkah laku.

/pardu/ arti setemene yaiku paran-paran hang wajib dilakoni, taping artine bisa dadi liya.

Ana pardu paran? (Ada perlu apa?).

Uga ucap-ucap liyane seruwal (teka: sirwalun, celana pendek). Ana maning maderusan (tadarus).

Merga hing ana /f/, /q/, /z/ mau, penulisan ucap-ucap iku dadi gedigi:

Kuran/Koran dudu Quran, isak dudu isya’, lohor dudu dzuhur, asar dudu ashar, magrib dudu maghrib, dhikir dudu dzikir, Patehah dudu Fatihah, wudu dudu wudlu lan liya-liyane.

Dadi, mbisuke mesthi dipikiraken pelanggeran hang ana, lan nambahi aksara hang ana ring basa Using. Utamane kadhung ana ucap hang mbedakaken uni velar /k/ lan uni glotal /?/.

Contone gedigi:

/pak/ ‘bapak’ vs /paq/ ‘sak bungkus rokok’

/tik/ ‘ lare wadon’ vs /tiq/ ‘mesin tulis’

Kadhung miloni pelanggeran saiki, uni velar lan glotal sing ana bedane. Nganteni uwong-uwong hang nduweni wigati nang basa Using, ring pemerintahan, ring kebahasaan, ahli basa, lan liyane lungguh bareng ngerumusaken perkara iki kanggo nambahi jejege basa Using.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor