Using Saya Asing

Antariksawan Jusuf (dipublikasikan pada Selasa, 12 November 2024 07:22 WIB)
- Opini

Using Saya Asing

Kelendi abote njejegaken Using ring Tanah Belambangan? Gambarane sithik bain gedigi. Tepak dikongkon ngisi waktu nganteni Pengumuman Pemenang ring acara Literasi Using 2024 ring bungase ulan Oktober, lalare hang maju nggandhang milih lagu-lagu basa Jawa. Lan lagu-lagu Jawa hang dipilih iku lagu-lagu "cinta" hang lirike dudu dienggo lare-lare SD. Nong endi gendhing-gendhing basa Using saiki? Nong endi gendhing-gendhing kanggo lalare?
   Dadi saiki wis anjrah nong panggonan wong duwe iwuh utawa kadhung ana kerameyan, lagu-lagu Jawa hang diunekaken timbang lagu Using, jare Ketua Dewan Kesenian Blambangan (DKB) Hasan Basri.
    "Kadhung ana limang lagu, lagu Usinge mung siji," tambah Kang Son, celukane Kang Hasan Basri.
   Kahanan keserene lagu Using ring umahe dhewek, kedaden ring acara sangang taun Kampoeng Batara Papring Kalipuro. Kang Son hang diundang merdhayoh bengi iku nyekseni lagu basa Using hang saya minggir. Ya gedigu. Sedurunge Catur Arum, grup band hang manggung nggawa lagu Jawa. Dene lagu basa Using hang njumbul mung siji.
   Kang Ali Kenthus, tukang ngewer teka grup Pelangi bareng Selamet Penyet, Gopel lan Pelecer hang milu ngisi acara Hikayat Bambu bengi iku, sampek ngomong gedigi engkisuke, "Rasane bain Hun hing kari iri ring dhaerah kono kadhung akeh lagu Medurane. Kadhung lagu Jawa iki njajah kiwa tengen, ya Medura ya Using."
   Nong Papring iku wilayah hang wong-wonge nganggo basa Using lan Medura, bangur nggawa lagu Medura utawa Using, tambah Kenthus.
   Kenthus cerita, cumpu hing mung lagu hang keseren. Ana pejabat hang pidhato, ditirokaken Kenthus "Marilah melestarikan seni gandrung. Jangan sampai diaku dhaerah lain."
   Dhong-dhonge anake ring sekolahan milu kegiyatan ekstra kurikuler Menari lan Tari Gandrung malah dipenging.
   Isun bisik-bisik nang Widie Nurmahmudy minangka hang mandegani anane Kampoeng Batara. Ambi setengah kemisinen iyane cerita gok tau disindhir salah siji anak buahe, "Nyuruh orang pakai bahasa Using tapi sama anaknya pakai bahasa Indonesia."
   Iki hang diadhepi keluwarga anyar hang wedi engko anake hing bisa miloni jaman. Ninggalaken basa dhaerah aju nganggo basa Indonesia.
   Setemene teori bahasane iku lalare sakat cilik digeningaken nyesep basa sak akeh-akehe, engko lare iku mara-mara bisa milah lan milih dhewek.
   Umpamane, kadhung ana pasangan emake Using lan bapake Medura, ideale, emak ngomong Using nang anake lan bapak ngomong Medura nang anake. Kadhung wis gedhi, anake otomatis bisa basa Medura, Using lan Indonesia hang diwulangaken ring sekolahan. Kelawan gedigi, basa dhaerah bisa saya kuwat merga ring umah lan keluwarga dienggo saben dina.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.