Uthek-Uthek Utek

Antariksawan Jusuf (dipublikasikan pada Sabtu, 22 Juni 2024 08:31 WIB)
- Opini

UTHEK-UTHEK UTEK

Ditulis ring Iskak Basuki

Milu girang rungu berita ring medsos ana lare penter sampek tingkat nasional perestasine, paran maning asale teka SMAnisun, SMANSA Banyuwangi hang saiki dadi SMAN 1 Glagah. Arane Naufal Hafidz Sayyidina Hawari.

Setemene saben taun ring sekolahan endi bain mesthi ana bain lare hang penter, siswa utawa siswi hang uteke mula encer ngelebihi kanca-kanca sak angkatane. Bisa uga ana lare pira hang undha-undhi kepinterane. Biyasah, sing jare-jare.

Liyane iku ya kaya umume lare, ya lalare biyasah sampek luwar biyasah...bebele. Sing nyamah naping mula nyatane yara gedigu. Wis umume, ring endi-endi sekolahan gedigu iku. Kudune ya sing ulih seteruse gedigu kadhung kepingin negara iki sing seteruse gedigi iki kahanane. Embuh kelendi carane, kudune kabeh anake Ibu Pertiwi saben sak kelas padha pentere, makene maju negara iki kaya dene negara-negara manca. Kaya Amerika utawa Jepang, contone.

Jaman saiki sih wis akeh negara kana-kana hang nututi dadi negara maju pisan. Bengen, taun 70-an, hang paling sering disebut, hang paling diakoni hebate ya Jepang - jare wong tuwek-tuwek bengen Cepang - ambi Amerika, kamsude Amerika Serikat. Sampek tau ana kalangane para pakar hang mbandhing-mbandhingaken, paran bedane kepinterane wong Jepang ambi Amerika?

Jawabane, analogine sunggane lare sekolah: Lare Amerika sak kelas mesthi ana hang ulih biji 10, ting ya ana hang ulih ngingsore 9. Sedheng lare Jepang, sak kelas sing ana hang ulih biji 10, ting rata-rata bijine 9. Bidane jare gedigu.

Saiki saya akeh wong penter ring saben negara. Wong Indonesia setemene ya ana pirang-pirangane hang penter, hang kondhang sak donya. Contone hang kelasik ya ruwahe pak Habibie. Seliyane ruwahe ya akeh, ting umume sayange magih biyasah sampek luwar biyasah...bengoke. Akeh-akehe sing dhemen mikir, sing tau dienggo uthek-uthek uteke. Sing nyamah bangsane dhewek, nyatane yara mula magih gedigu.

Apike, ana kabar apik iki teka PBUD (Pusat Bursa Utek Dunia); basa Inggerise embuh paran, embuh ana embuh sing? Jare, uteke wong kene iku ternyata termasuk utek hang paling digoleti, paling diminati arep dituku ring kana.

Kok bisa? Sing salah? Sing kewalik tah? Mesthine yara uteke wong Jepang, Amerika utawa negara maju liyane hang garus!

Using! Uteke wong teka negara-negara maju tosene Amerika lan Jepang iku jare wis kari ampase, wis entek sarine kakehan diperes enggo mikir. Beda ambi uteke wong kene hang sing patiya enggo mikir, magih wutuh. Mangkane larang. Beritane gedigu jare...

Ya jare..

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.